Европа Иттифоқи давлатлари Россияга қарши янги санкциялар бўйича келиша олмаяпти —  Politico

Европа Иттифоқи мамлакатлари вакиллари янги санкциялар пакети бўйича келиша олмади, дея маълум қилди Politico манбалари.

Нашрнинг ёзишича, Еврокомиссия йиғилиш олдидан чекловларнинг бошқа версиясини тақдим этган, бироқ бу келишувга олиб келмаган. Европа Иттифоқи элчилари 14 июнь куни яна учрашади.

Дипломатлардан бири Politico нашрига элчилар келишувга “яқинлашиб бораётганини” айтди. Нашрнинг ёзишича, Греция ва Венгрия пакетни блоклашда давом этмоқда. Улар Украинадан ўз компанияларини “уруш ҳомийлари” рўйхатидан олиб ташлашни талаб қилмоқдалар. Бундан ташқари, бир қанча давлатлар, жумладан, Германия ва Франция Россия санкцияларини четлаб ўтишнинг олдини олиш чоралари бошқа давлатлар билан дипломатик алоқаларга зарар етказиши мумкинлигидан хавотирда.

Европа Иттифоқи санкцияларининг 10-пакети февраль ойида жорий қилинган эди. Ўшандан бери янги чора-тадбирлар муҳокама қилинди. Еврокомиссия раҳбари Урсула фон дер Ляеннинг сўзларига кўра, санкция режимини бузган дунё бўйлаб 90 дан ортиқ компанияларга нисбатан чекловлар жорий этилади.