Болаликдаги шуҳрат — кўпчилик бардош бера олмайдиган оғир синов. Ёшлигида машҳур бўлган совет актёрларининг кейинги тақдири қандай бўлгани ҳақида маълумот берамиз.
Дмитрий Иосифов — “Буратинонинг саргузаштлари”
Дмитрий Иосифов 9 ёшида Леонид Нечаевнинг “Буратинонинг саргузаштлари” номли машҳур эртагида бош ролни ижро этиб, шуҳрат қозонди. Болалигида Иосифов фигурали учиш билан шуғулланган ва актёрликни орзу қилмаган. У кастингга тасодифан келиб қолади — дастлаб уни Арлекин ролини ижро этишга тасдиқлашади. Фақатгина режиссёр Леонид Нечаев бош ролга бола топишдан деярли умидини узгандагина Иосифовни эслайди.
“Буратинонинг саргузаштлари”дан кейин Иосифов яна Леонид Нечаевнинг “Қизил қалпоқча ҳақида” фильмида, Николай Лукяновнинг “Капитан Ёлғончи” фильмида ва бошқа фильмларда рол ижро этади.
16 ёшида Иосифов ВГИКда Алексей Баталов курсида ўқийди. Ёши туфайли уни режиссёрлик бўлимига қабул қилишмайди, аммо кейинчалик у Беларусь санъат академиясининг режиссёрлик бўлимини тамомлайди.
1990 йилларда Иосифов Москвага кўчиб бориб, у ерда йирик брендлар учун реклама суратга олиш билан шуғулланади. Кейинчалик у “Қудрат”, “Диверсант”, “Елизавета” каби телекўрсатувлар ва сериаллар устида ишлашни бошлайди. 2021 йилда эса Иосифов “Жаҳон чемпиони” фильмида шахматчи Михаил Тал ролини ижро этиб, мухлисларида чин маънода носталгия туйғусини уйғотди.
Юрий ва Владимир Торсуeвлар — “Электрониканинг саргузаштлари”
Юрий ва Владимир Торсуeвлар “Электроника саргузаштлари” фильмида рол ўйнагач, бир кечада машҳур бўлиб кетишади. Константин Бромбергнинг бу асарида Юрий Торсуeв тиниб-тинчимас Серёжа Сироежкин ролини, укаси Владимир эса унинг робот-эгизаги ролини ижро этган. Ёдда қоларли қўшиқлар ва фантастик сюжетга эга бу фильм дарҳол совет киносининг классикасига айланади.
Кейинчалик улар “Ҳовлимиздаги Билмасвой” фильмида суратга тушишади, аммо у “Электроника” муваффақиятини яқинига ҳам бора олмайди. Уларга бўлган қизиқиш тобора сусайиб, охир-оқибат бутунлай йўқолади. 1990 йилларда Торсуeвлар кинодан кетиб, турли соҳаларда, жумладан, бизнесда ҳам ўзларини синаб кўришди. Ҳатто такси ҳайдовчиси бўлиб ҳам ишлашади.
Наталя Мурашкевич (Гусева) — “Келажакдан келган меҳмон”
Наталя Гусева (турмушга чиққач Мурашкевич) Кира Буличевнинг “Келажакдан келган меҳмон” фантастик романи асосида суратга олинган фильмда Алиса Селезнёва ролини ижро этган. Гусеванинг қаҳрамони бутун бир авлоднинг рамзи ва барча совет ўғил болаларининг орзусига айланган. 80 йилларда Гусева жами бешта бадиий фильмда суратга тушган, бироқ кейинчалик унинг карьераси кутилмаган йўналишга бурилган. Бурилиш нуқтаси унинг “Авария — милиционер қизи” фильмида суратга тушишни рад этиши бўлган. Гусева ўз қарорини Алиса Селезнёванинг ёрқин образига путур етказишни истамаслиги билан изоҳлаган.
Актёрлик ўрнига у илм-фанни танлаган. Кейинчалик Гусева ҳеч қачон актёрликка жиддий қарамаганини, лекин биология уни чиндан ҳам қизиқтирганини тан олган. У Москва давлат университети биотехнология кафедрасини тугатган ва вирусолог сифатида фаолият юритган.
2008 йилда у “Литeйний” сериалининг бир эпизодида рол ўйнаб, экранларга қайтди. Бироқ у Алиса Селезнёва образида яшашда давом этмоқда. 2024 йилда Александр Андрюшченконинг “Юз йил олдинга” фильми экранларга чиқди. Алиса ролини Даря Верешчагина ижро этди. Коля Герасимов ролини эса Марк Эйделштейн гавдалантирди. Шунингдек, фильмда Константин Хабенский, Юра Борисов, Александр Петров ва бошқа кўплаб актёрлар ҳам рол ўйнади.
Изоҳ (0)