СССР кинопрокатининг мутлақ етакчиси “Есения” фильмининг бош қаҳрамони 50 йилдан сўнг қандай кўринишда?

Совет иттифоқи даврида кинотеатрга бориш энг оммабоп дам олиш турларидан бири эди. Одамлар кинога бутун оила бўлиб, ҳатто мактаб ўқувчилари эса бутун синф бўлиб боришарди. Бунинг бир неча сабаби бўлган. Биринчидан, билет нархи арзон эди — кундузги сеанс чиптаси битта музқаймоқ қийматига тенг эди. Иккинчидан, маданий ҳордиқ чиқариш учун жойлар жуда кам бўлган.

Прокатда энг муваффақиятли совет фильмлари орасида режиссёр Борис Дуров томонидан суратга олинган биринчи совет жанговар фильми “ХХ аср қароқчилари” бўлди. Уни СССРнинг 87 миллион аҳолиси томоша қилган. Владимир Меншовнинг “Москва кўз ёшларга ишонмайди” мелодрамаси (84 миллион) ва Гайдайнинг “Бриллиант қўл” комедияси (76 миллион) етакчилик қилган. Аммо кинопрокатнинг мутлақ рекордчиси чет эл картинаси — деярли 92 миллион киши томоша қилган Мексиканинг “Есения” мелодрамаси бўлди.

“Госкино”дагилар нима бўлаётганини тушунмай ҳайратда эди. Қандай қилиб мексикача картина совет прокатининг етакчисига айланди? Одамлар эса ҳамон кинотеатрларга боришарди...

Кўплаб аёллар бош қаҳрамон либослари фасонини эслаб қолиш ва шунга ўхшаш кўйлаклар тиктириш учун сеансларга икки-уч мартадан тушишарди.

Қизиғи шундаки, фильм ҳатто Хитойда ҳам жуда машҳур бўлиб кетади — ҳар йили қайта-қайта намойиш этилади.

Фильм нима ҳақида?

Сюжет марказида офицер билан ишқий муносабатда бўлган гўзал лўли қиз Есения туради. У йигит билан жуда ғалати вазиятда танишган — қиз Освальдонинг ҳамёнини ўғирлаган, кейин эса севиб қолган...

Ёшлар лўлиларнинг барча урф-одатларига риоя қилган ҳолда турмуш қуришга қарор қилишди. Есения табордан чиқиб кетади ва эри билан яшай бошлайди. Аммо кутилмаганда Освальдонинг муаммолари бошланади, уни ҳибсга олишади ва Есения уйига қайтади.

Бир куни эса Есениянинг бувиси неварасига ҳақиқатни айтишга қарор қилади. Маълум бўлишича, аслида Есения бадавлат оиладан бўлиб, ота-онаси ундан воз кечган экан.

Узоқ ўйлаб ўтирмай, лўли қиз ҳақиқий оиласининг олдига боради ва Луиза исмли синглиси борлигидан хабар топади. Шу пайт кутилмаганда уйда Освальдо пайдо бўлади, у Луизани кўргани келган экан.

Маълум бўлишича, узоқ вақт асирликдан қайтган Освальдо Есенияни излаб, тополмайди... Қайта учрашган Есения ва Освальдо энди бир-бирисиз яшай олмайди, муҳаббати туфайли юраги синган синглиси эса Есениянинг бахтини ўйлаб, чет элга кетади.

50 йилдан сўнг...

Бош ролни мексикалик актриса Жаклин Андере ўйнаган, аслида бу роль дастлаб бошқа таниқли актриса Фанни Кано учун мўлжалланган эди. Аммо Фаннининг жуда бадавлат ва нуфузли турмуш ўртоғи бу лойиҳада роль ўйнашни унга тақиқлайди.

Освальдо ролини мексикалик актёр Хорхе Лават ўйнаган, у кейинчалик яна 76 та фильмда роль ўйнайди, лекин афсуски, 2011 йилда бу дунёни тарк этади.

Есениянинг синглиси ролини ўйнаган актриса Луиса Ирма Лозано ҳам 11 йил олдин вафот этган. Жаклин эса яқинда таваллудининг 86 йиллигини нишонлади.

У ҳозир ҳам жуда чиройли. Қизи ҳам ўзи каби актриса бўлган. Бугунги кунда Жаклин невара ва чеваралари тарбияси билан машғул.