«Чебурашка» оилавий фильми прокатнинг дастлабки беш кунида 2 миллиард рубль йиғди — фильм бюджетини уч марта оқлади ва барча рекордларни янгилади. Нега бу фильм томошабинларда бунчалик катта қизиқиш уйғотди? «Чебурашка» қандай суратга олинган? Бу ҳақда материалимиздан билиб оласиз.
Суратга олиш ишларига қандай тайёргарлик кўрилган?
Фильм сценарийси бир ярим йил давомида ёзилган, Виталий Шляппо раҳбарлигида сюжет устида Yellow, Black аnd White студияси муаллифлари ишлаган. Фильм режиссёри Дмитрий Дяченко бўлиб, уни томошабинлар «Эркаклар нима ҳақда гаплашади» ва «Сўнгги паҳлавон» фильмлари орқали яхши танишади.
«Чебурашка» фильми нима ҳақида?
Бу биз болалигимизда кўрган мультфильм эмас. Бироқ Эдуард Успенскийнинг эртагига асосланган «Чебурашка»да оригиналидан баъзи воқеалар қолдирилган. Сиз барча бош қаҳрамонларни танийсиз, гарчи бу сафар улар эски мультфильмдан бутунлай фарқ қилса ҳам.
Бу сафар Чебурашка Лотин Америкасида яшайди, у ерда одамлар апельсин етиштиришдан пул топишади ва митти жонивор апельсинни яхши кўргани учун плантаторларни безор қилиб юборган. Кунларнинг бирида кучли торнадо қаҳрамонимизни Россиянинг жанубига, денгиз бўйидаги шаҳарчага олиб кетади. Чебурашка маҳаллий дарахтзорда ишлайдиган боғбоннинг уйига келиб қолади. Жуда оғир характерга эга бўлган бу ғамгин кекса одамни Гена деб аташади. Бу сафар Чебурашканинг дўсти тимсоҳ эмас, балки ўсимликларни жуда яхши кўрадиган ва одамларни ёқтирмайдиган қария.
6 тонна апельсин
Чебурашка жанубга ёлғиз эмас, балки ҳақиқий апельсин булути билан бирга учиб келади. Ушбу саҳнани суратга олиш учун режиссёрлар 6 тонна мева сотиб олишди. Бу ранг-баранг, тўқ сариқ рангли саҳна Кисловодскдаги Курортний булварида суратга олинган. Тасвирга олиш гуруҳи кўчада минглаб апельсинларни сочишган, кейин эса Гена ролини ўйнаган Сергей Гармаш бу ердан скутер миниб ўтади.
Бирорта ҳам дарахтга зарар етмаган
Суратга олиш гуруҳи жуда кўп вақтни Сочи миллий боғидаги дендрарий (фақат дарахт ва буталар тўпланган ботаника боғи) ҳудудида ўтказди. Бу вақтда боғ ёпилмаган ва одатдагидек ишлаган, шунинг учун сайёҳлар ва дендрарийга ташриф буюрувчилар суратга олиш жараёнини кузатишлари мумкин эди. Боғ ходимларининг сўзларига кўра, бу ерда қарийб эллик йил давомида бундай воқеа содир бўлмаган, шунинг учун улар миллий боғ хавфсизлигидан жуда хавотирланишган. Лекин ҳаммаси яхши ўтади. «Чебурашка» ижодкорлари ҳамма нарсани дендрарий раҳбарияти билан олдиндан келишиб олади, жумладан: суратга олиш ишлари қаерда бўлиб ўтади, қайси ўсимликларга тегиш мумкин ва бу ерда яшайдиган қушлар безовталанмайдими каби.
Сочи миллий боғи тадқиқотчиси Галина Солтани фильмни суратга олиш жараёни ҳақида шундай дейди: «Суратга олишдан олдин жиҳозлар, улкан машиналар, бир неча ўнлаб одамлар олиб келинган. Тасвирга олиш гуруҳи барча шартларга риоя қилгани бизни ҳайратда қолдирди: улар майсазорларни босмадилар, реквизитлардан эҳтиёткорлик билан фойдаланишди ва ҳатто ўзларининг гулзорларини ясадилар, чунки боғдаги ўсимликларга тегиш тақиқланган. Суратга олиш учун панжараларни қайта бўяшди, лекин кейин олдинги рангни қайтаришди. На бир ўсимлик, на майсазор, на бир дарахтга зарар етмади».
Чебурашка ролини ким ўйнаган?
Чебурашкани «Ошхона» сериалидан кейин рус томошабинларига маълум бўлган актриса Ольга Кузмина ижро этган. Ольга учун анимацион рол ўйнаш янги ва жуда ноодатий тажриба эди. Актрисанинг сўзларига кўра, фильм режиссёри Дмитрий Дяченко унга шундай хабар жўнатган: «Ольга, Чебурашка овозида бир нечта гапларни аудио қилиб юбор-чи».
Ольга Кузмина актриса Клара Румянованинг совет мультфильмида Чебурашкага қандай овоз берганини бир неча бор тинглайди. Шундай ғайриоддий тарзда актриса кастингдан ўтади. Суратга олиш пайтида Ольга деярли доим саҳна ортида ўтиришга мажбур бўлади. Саҳнани бошқа актёрлар ўйнаганидан кейин у ўз ролини ўйнайди. У ёлғиз ўйнайди, одатда стулда ўтиради. Фақат актрисанинг юз ифодалари ёзиб олинган, шундан кейин анимацион Чебурашканинг юз ифодалари яратилган.
Ольга Кузмина анимация билан ишлашдаги ғайриоддий тажрибаси ҳақида шундай дейди: «Саҳна ортидаги актёрлик иши қийин, аммо жуда қизиқарли эди. Бу момиқ ҳайвон бўлган барча саҳналарда мен ҳам кўринмас ҳолда иштирок этаман. Мен масъул бўлганим бу — ҳис-туйғулар, юз ифодалари, реакциялар ва, албатта, Чебурашканинг овози. Кўп саҳналарда кадрда бўла олмадим, чунки Чебурашка мендан анча кичик, шунинг учун бундай пайтларда кўринмаслигим керак эди. Кейин аниматорлар чизишни тугатишини кутишим керак эди ва бу жуда машаққатли жараён. Шунинг учун мен деярли ҳар доим ёлғиз саҳналарни ўйнашга мажбур бўлдим, шерикларим илгари кадрда ўйнаган ҳамма нарсани тасаввур қилиб, ижро этардим».
Ольга Кузминадан ташқари, суратга олиш майдончасида қўғирчоқ ҳам ўйнайди. Кадрда Чебурашка билан мулоқотда бўлган актёрлар уни қўлларига «олишлари» ва яхшироқ тасаввур қилишлари учун керак эди.
Фильмда яна кимлар ўйнади?
Гена ролини юқорида айтиб ўтганимиздек, актёр Сергей Гармаш ижро этди. У ўз вазифасини аъло даражада бажарди — тимсоҳни «одамга айлантирди». Гена айнан шундай бўлди: беғубор, ғамгин, сергап, одамови.
Инжиқ набираси Соня учун Чебурашкани Генадан олиб қочмоқчи бўлган ишбилармон аёл Римма ролини Елена Яковлева ижро этди. Римманинг ёрдамчиси — Дмитрий Лисенков. Кичкина қандолатчилик корхонаси эгаси Генанинг қизи Таняни Полина Максимова ижро этган. Хотинини отаси билан яраштиришни орзу қилган Танянинг эри ролини актёр Сергей Лавигин ўйнаган. Ушбу фильмда одамлардан ташқари ҳайвонлар ҳам иштирок этган: 26 та каламуш, 8 та канарейка ва тўтиқуш, 6 та гвинея чўчқаси, 1 та булдог ва 1 та игуана.
Фильм қаҳрамонларининг либослари қандай яратилган?
Либослар бўйича дизайнер Наталя Каневская бу ҳақда шундай дейди: «Бизда тасдиқланган ранглар схемаси бор эди — тўртта асосий ранг (мовий, яшил, сариқ ва пушти) ва иккита қўшимча ранг (тўқ қизил ва шоколад ранги). Мисол учун, пушти ва сариқ рангларни Танянинг шкафи, унинг квартираси ва шоколад дўконида кўриш мумкин. Танланган палитрада ҳамма нарса уйғунлашиши учун рассомлар билан тандемда ишладик, биргаликда характерларнинг ранг схемасини тўпладик. Мисол учун, Риммани режиссёр мовий либосда кўришни хоҳлади. Унинг биринчи костюми оқ кўринади, лекин у енгил мовий ва банан рангида. Римма эса Генанинг оиласи билан рақобатлаша бошлаганида у тўқ денгиз рангидаги костюмини кияди. Унинг катта шоколад фабрикасининг логотипи эса тўқ қизил ва тилларанг».
Наталя Каневская сўзларига кўра, ҳатто Генанинг оддий иш комбинезони устида ҳам кўп меҳнат қилинган: «Гена учун жуда узоқ вақт иш комбинезонини қидирдик. Мен винтаж дўконларни ҳам, махсус иш кийимлари дўконларини ҳам кўриб чиқдим. Натижада эскирган кўринишда ўзимиз тикишга қарор қилдик, ўн йил давомида кийилганлиги билиниши керак эди. Мен Генанинг мультфильмдагидек, капалакнусха галстукли тўқ қизил пиджаги бўлиши кераклигини ҳам тушундим. Уни ҳам тикдик. Бунинг учун замшни танладим — у 1970 йилларнинг ретро услубида, 1990 йиллардаги ассоциацияларсиз бўлиши керак эди».
«Чебурашка»нинг муваффақияти
Кино ижодкорлари ва ушбу лойиҳада иштирок этган ҳар бир киши, албатта, томошабинлар Чебурашкани яхши кўриб қолишларига ишончлари комил эди. Central Partnership кинокомпаниясининг бош директори Вадим Верешчагин лойиҳа ҳақида шундай дейди: «Чебурашка — оила даврасида кўриш учун мўлжалланган катта ва кенг кўламли лойиҳа, биз унга ҳатто ғоя даражасигача кўтардик. Сценарий ниҳоят мени ишонтирди: бу ҳақиқий халқ ҳити бўлади, уни Совет мультфильмида ўсганлар ҳам, у билан унчалик таниш бўлмаганлар ҳам яхши кўрадилар».
Аммо ижодкорлар картина ҳақиқий касса рекордига айланади деб ўйламаган ҳам бўлса керак. Янги йилнинг илк 5 кунида «Чебурашка» 2 миллиард рублдан ортиқ маблағ йиғди, бу Россия киноси тарихидаги рекорд кўрсаткич ҳисобланади. Фильмни ишлаб чиқаришга 850 миллион рубль сарфланганлигини ҳисобга олсак, фильм беш кун ичида харажатларни деярли уч марта оқлаган.
Мавзуга доир: «Чебурашка» яна экранларга қайтди, аммо бутунлай бошқа сюжет билан — энди Гена тимсоҳ эмас
Изоҳ (0)