Хитойлик Люси Го Forbes томонидан тузилган дунёдаги энг ёш миллиардерлар рейтингида Тейлор Свифтни ортда қолдирди. Forbes баҳолашича, Гонинг бойлиги 1,25 миллиард долларни ташкил этади.
Люси Го 21 ёшида коллеждаги ўқишидан воз кечиб, сунъий интеллект бўйича Scale AI компаниясини ташкил этган. Унинг шериги 19 ёшли Александр Ван бўлган. Го Сан Францискодаги стартапда операциялар ва маҳсулотларни ишлаб чиқиш бўйича жамоаларни бошқарган. 2018 йилдаёқ компаниянинг ҳар иккала асосчиси Forbes Under 30 рўйхатига киритилган. Ўша пайтдаёқ шериклар компаниянинг келажагига бўлган қарашларида келишмовчиликка тушиб қолишди ва Ван Гони ишдан бўшатди. Люси Scale AI компаниясидан кетиб, компаниядаги акцияларининг катта қисмини сақлаб қолди.
Ҳозирда у Scale AI акцияларининг тахминан 5 фоизига эгалик қилади, уларнинг нархи деярли 1,2 миллиард доллар деб баҳоланмоқда. Ва бошқа активларини, жумладан, Passes стартапидаги акцияларини ҳисобга олсак, Гонинг бойлиги 1,25 миллиард доллар деб баҳоланмоқда.
“Мен бу ҳақда унчалик ўйламайман, бу бир оз ақлга сиғмайди. Афсуски, буларнинг барчаси фақат қоғозда”, деди Люси миллиардер мақоми ҳақида.
Го — сайёрамиздаги 40 ёшгача бўлган ўз кучи билан бойлик орттирган олти аёл миллиардердан бири. У, шунингдек, кўп йиллар аввал тарк этган компаниясидан катта миқдорда маблағ орттирган ягона аёлдир.
У Хитойдан келган муҳожир ота-онанинг фарзанди. У Сан Франциско кўрфазида ўсган ва ўрта мактабда дастурлаш билан шуғуллана бошлаган, Карнеги-Меллон университетида информатика ва инсон-компьютернинг ўзаро таъсирини ўрганган. Люси диплом олишдан олдин ўқишни ташлаб, Тил стипендиати бўлган. Бу стипендия миллиардер инвестор Питер Тил томонидан молиялаштириладиган дастур, бу дастур талаба тадбиркорларга ўз компанияларини яратиш имконини беради. 2015 йилда Го Quora компаниясида маҳсулот дизайнери бўлиб ишга кирган ва Ван билан танишган. У Quora компаниясидан кетиб, бир муддат Snapchat компаниясида маҳсулот дизайни билан шуғулланиб, 2016 йилда Ван билан биргаликда Scale AI компаниясини ташкил этган.
Люсининг машҳурлар доирасида юрадиган қизғин зиёфатчи эканлиги таъкидланади. Унинг дўстлари орасида Бекҳэм оиласи ҳам бор.
Эслатиб ўтамиз, аввалроқ энг ёш миллиардерлар рўйхатини Тейлор Свифт бошқарган, у Eras Tour шоусидан тушган даромадлари туфайли Рианнани ортда қолдирган.
Изоҳ (0)