Кипр ҳукумати республиканинг инвестиция дастури доирасида “олтин паспорт” олган 77 нафар чет элликни фуқароликдан маҳрум қилди. Улар қаторида россиялик миллиардерлар ҳам бор. Бу ҳақда Politis хабар берди.
“Русал” асосчиси Олег Дерипаска, “Алфа-Групп” акциядори Алексей Кузмичев, “Сафмар” гуруҳи асосчиси Михаил Гуцериев, шунингдек, “Пробизнесбанк” собиқ эгаси Александр Железняк Кипр фуқаролигидан маҳрум этилди. Рўйхатга бирданига 2024 йилда Forbes миллиардерлари рейтингидан жой олган етти нафар россиялик миллиардер кирди.
Рўйхатга россиялик тадбиркорлардан ташқари бир нечта украиналик ҳам киритилган. Мисол учун, фирибгарлик ва пул ювиш бўйича Киев ҳибсхонасида сақланаётган миллиардер Игор Коломойский, шунингдек, “УкрЛандФарминг” эгаси Олег Бахматюк.
“Олтин паспорт”лар учта сабабга кўра бекор қилинади
Хорижликлар рўйхати тахминан бир ой олдин тайёрланган. “Олтин паспорт”дан нафақат инвесторларнинг ўзлари, балки уларнинг оила аъзолари ҳам маҳрум бўлади. Кипр фуқаролигидан маҳрум қилиш уч сабаб билан асосланиши мумкин: ариза беришда ёлғон ёки чалғитувчи маълумотлар, ариза берувчининг жиноий ўтмиши ва натураллаштириш шартларига риоя қилмаслик.
Паспортидан маҳрум бўлган чет элликлар Кипр ҳукуматининг қарори устидан шикоят қилиши мумкин. Кипр кўп сонли суиистеъмолликлар фонида 2020 йилда “олтин паспортлар” бериш дастурини тўхтатди. Al Jazeera журналистлари томонидан ўтказилган тергов натижасида ҳатто маҳкум чет элликлар ва қидирувдагилар ҳам фуқароликни олиши мумкинлиги аниқланди.
Изоҳ (0)