Америкалик хонанда Мадоннанинг барча замонларнинг энг яхши клипи деб тан олинган видео янги рекорд ўрнатди. Хонанда карьераси бошида чиққан La Isla Bonita номли қўшиққа ишланган клипнинг кўришлар сони YouTube платформасида 1 миллиард мартадан ошди.
Қўшиқ илк бор 1986 йилда оммага тақдим этилган. У хонанданинг True Blue номли альбомига киритилган. Куни кеча эса қўшиқ чиққанидан деярли 40 йил ўтиб, у YouTube’да миллиард кўришга эришди. Мазкур клип ўзи Мадонна томонидан YouTube’даги каналига 2009 йилда жойланган, яъни рекорд ўрнатиши учун унга 16 йил керак бўлган.
Ҳозирги кунда La Isla Bonita Мадоннанинг миллиард кўришлар йиғган биринчи ва ягона клипидир. Хонанданинг бошқа машҳур қўшиқлари, хусусан, Like a Prayer, Vogue, Hung Up вa Material Girl кабилар ҳам юз миллиондан ортиқ марта томоша қилинган.
1980 йилларнинг поп мусиқа саҳнасини забт этган Мадонна мусиқа санъатида ўзига хос услуби ва клиплари билан ажралиб турган. 1987 йилда чиққан La Isla Bonita қўшиғи испанчадан таржима қилинганда “Гўзал орол” деган маънони билдиради. Унда Мадонна Сан Педро номли афсонавий оролни тасвирлайди — бу жой унинг хаёлидаги жаннат, сокинлик ва муҳаббат маскани сифатида гавдаланади. Қўшиқ матнида қуёшли тонглар, гитара садолари ва экзотик ҳаёт тарзи орзудек тасвирланади.
Режиссёр Марй Ламберт томонидан суратга олинган клипда Мадонна икки хил образда намоён бўлган: бири диндор ва сокин қиз, иккинчиси юрагида ўти бор ва жўшқин аёл. Бу икки образ орқали Мадонна ички қарама-қаршиликни — ички истак ва эътиқод ўртасидаги зиддиятни ифодалайди. Клип испанча эстетика билан бойитилган: фламенко рақслари, торли мусиқа асбоблари, миллий либослар ва Лотин Америкаси руҳиятидаги кўчаларда суратга олинган лавҳалар бунга мисол бўла олади.
Изоҳ (0)