Бойлик ва машҳурлик доим ҳам фарзандларга мерос бўлиб қолмайди. АҚШда ва айрим Европа давлатларида бадавлат ота-оналар фарзанди вояга етгач унга моддий ёрдам бермаслик орқали мустақил ҳаётга ўргатади. Шоу-бизнес оламидаги биз таниган машҳурлар ҳам ана шундай кунларни бошидан ўтказган. Қуйида ота-оналарининг кенг имкониятларига қарамай, молиявий қийинчиликлар билан узоқ вақт курашган (ёки курашишда давом этаётган) юлдузлар ҳақида ҳикоя қиламиз.
Дэвид Банда
Америкалик хонанда Мадоннанинг асраб олинган ўғли Дэвид болалигида тўкин-сочинликда улғайган. Аммо унинг онаси ўғли устидан доимий назорат қилувчи ва чеклаб қўювчи ҳаракатлар қилмайди, Дэвид мустақил тирикчилик қилиши учун унга эркинлик беради. Ҳозирда Банда мусиқа соҳасида фаолият юритиб келмоқда.
Яқин орада Дэвид Банда ўзининг Instagram саҳифасида қўйган фотосурати остида қуйидаги сатрларни ёзиб қолдирди: “Мана, кечки соат тўққиз ҳам бўлди. Менинг қорним оч ва овқат сотиб олиш учун пулим етмайди. Бунинг учун энди мен чиқинди йиғишим керак”.
Мустақил ҳаёт ҳақидаги Дэвиднинг сўзларини кўпчилик нотўғри тушунди ва Мадонна ўгай ўғлини уйидан ҳайдаб юборгани ҳақида ёлғон миш-мишлар тарқалди. Дэвид бу тахминларни дарҳол рад этди ва мустақил турмуш тарзи унга жуда ёқишини таъкидлаб ўтди.
У гитара чалиш бўйича дарс ўтади. Гарчи Дэвиднинг маоши катта бўлмаса-да, қаллиғи Мария Атуэста уни доимо қўллаб-қувватлайди.
Маълумот учун: хонанда Мадонна Малави давлатидан тўрт нафар болани асраб олган. У 2006 йилда ўғли Дэвид Банда Мвалени, уч йилдан кейин эса қизи Чикундо Мерси Жеймсни асраб олган. Мадонна 2017 йилда эгизаклари Стелла ва Эстернинг васийлигини олди. Шунингдек, хонанданинг актёр Карлос Леондан Лоурдес исмли қизи ва режиссёр Гай Ричи билан турмушидан Рокко Жон исмли ўғли бор.
Дакота Жонсон
Дакотанинг отаси, актёр Дон Жонсон қизи 16 ёшга тўлганида унга молиявий ёрдам беришни тўхтатди. Интервьюлардан бирида у собиқ рафиқаси, актриса Мелани Гриффит билан келишиб олгани, агар Дакота олий ўқув юртига киришга қарор қилса, унинг ўқиш пулини тўлашга рози эканини айтган. Агар у бошқа йўлни танласа, ўзини-ўзи боқишга мажбур бўлиши ҳақида огоҳлантирган. Дакота иккинчи йўлни танлади ва шоу-бизнес оламига киришга қарор қилди. У кундалик эҳтиёжларга пул топиш учун модел сифатида иш бошлаган.
Қўшимча ўрнида: Дакотанинг онаси Мелани Гриффит ўз даврининг машҳур актрисаси бўлиб, у Голливуддаги кўплаб юлдузлар сингари муҳожирлар оиласидан бўлган. Улар Америкага Швециядан келган, отасининг аждодлари эса норвег ва немис бўлган.
Тори Спеллинг
Тори Спеллинг “Беверли Ҳиллс, 90210” юлдузи ва таниқли продюсер Аарон Спеллингнинг қизи бўлиб, 2006 йилда отасидан катта мерос қолади. Бироқ Тори кўпчилик кутганидан анча кам миқдорда улушга эга бўлди. Умумий бойлиги 500 миллион долларга баҳоланган ота Торига атиги 800 минг долларни васият қилган. Қолганлари Торининг онаси Кенди Спеллингга берилган.
Кейинчалик актриса ўзининг молиявий қийинчиликлари ҳақида тез-тез сўзлаб берадиган бўлди. Унинг фикрича, воқеаларнинг бундай ривожи Торини фирибгар ёки ўғри бўлиб қолишдан қайтарган.
Гвинет Пэлтроу
Бадавлат оилада туғилган баъзи инсонлар барчасини нолдан бошлашни ва молиявий мустақилликка эришишни болалигидан хоҳлайди. Мустақилликка бўлган катта истаги туфайли Гвинет Пэлтроу 16 ёшидан бошлаб ўзини таъминлай олган. Интервьюлардан бирида юлдуз таъкидлашича, унинг ота-онаси Блайт Даннер ва Брюс Пэлтроу қизларини имкон қадар тезроқ мустақил равишда пул ишлашни ўрганиши керак деган тушунча билан тарбиялаган. “Ўсмирлик давримдан бошлаб мен ота-онамдан бир сент ҳам олмадим ва шу орқали ўз-ўзим қайтадан кашф этдим”, дейди актриса.
Изоҳ (0)