Ойига 130 минг долларгача: машҳур аёллар гўзаллик муолажалари учун қанча пул сарфлайди?

Гўзаллик учун қанча пул сарфламанг, харажатларингизни юлдузларнинг ташқи кўринишига кеткизган маблағлари билан таққослаб бўлмайди. Улар ҳар доим омма эътиборида, шунинг учун улар гўзаллик процедураларини эътиборсиз қолдиролмайди. Бугун машҳурлар чиройли кўриниш учун ойига қанча пул сарфлаши ҳақида маълумот берамиз.

Ким Кардашьян

Ушбу рўйхатнинг норасмий маликаси Ким Кардашьяндир. У гўзаллик учун жуда кўп вақт ва пул сарфлайдиган юлдузлардан биридир. Унинг 364 миллион обуначиларининг деярли барчаси у салонларда ойига камида 180 соат ўтказишини билади — бу 7 кундан ортиқ дегани. Бир ойда у ўзи учун тахминан 130 минг доллар сарфлайди. Албатта, бу пулнинг катта қисми машҳурнинг шахсий мураббийи Мелисса Алькантарага кетади, у ҳар куни эрталаб юлдуз билан ҳафтада олти марта икки соатдан ишлайди.

Шунингдек, Ким Беверли Ҳиллсдаги Бэйли салонига ташриф буюриш учун ҳар икки ҳафтада 800 доллар тўлайди. Ҳафтада икки марта гликолик кислота билан юзни ёшартирувчи пилинг процедурасидан ўтади ва ойига бир марта олтин терапиясини олади. Лазер билан даволаш Кимга тери рангини сақлаб қолишга ёрдам беради — бу муолажа нархи 2000 долларни ташкил этади.

Ҳар 10 кунда бир марта юлдуз киприк эктириш, қошлар, маникюр, педикюр ва бошқа гўзаллик муолажаларини олади — буларга ойига тахминан 5 минг доллар кетади ва бу пластик жарроҳликни ўз ичига олмайди.

У ойига икки кунни спа муолажаларига бағишлайди. Ҳар уч ҳафтада 14 000 доллар соч парваришига, 1 285 доллар 24 каратли олтин ниқобларга ва яна 10 000 доллар лазер билан даволашга кетади. Кардашьян визажистлари (Марио Дедиванович ва Aриель Тежада) ҳамда сартарошлари (Крис Aпплетон ва Эндрю Фиц Симонс) жамоасига 2 дан 2,5 минг долларгача тўлайди. 

Рианна

Рианнанинг асосий гўзаллик харажатлари сочларига тўғри келади. Хонанда энг кўп пулни соч турмаги, соч рангини ўзгартириш ва парвариш қилишга сарфлайди. У сартарошига ҳафтасига 16 минг доллар тўлайди.

Косметологияга ойига яна 50 минг доллар кетади. Юлдуз асосан тозалаш ва пилингдан фойдаланади, баъзида лифтинг процедураларини ҳам олади, лекин у кислородли ниқоблар ва лазер терапиясини яхши кўради. Ҳафтада икки марта Рианнанинг уйига махсус мутахассис келиб, хонанданинг юзи ва танасига мукаммал загар беради. Битта процедуранинг нархи 800 долларни ташкил қилади.

Энн Хэтэуэй

Сочларига алоҳида эътибор берадиган яна бир юлдуз — Энн Хэтэуэй. Актриса табиий гўзаллиги билан машҳур, аммо чиройли соч катта пул талаб қилади.

Актрисанинг стилисти Тед Гибсон. Унинг биргина муолажаси 950 доллар туради, уйга ташриф эса ундан ҳам қимматроқ. Хэтэуэй кўп йиллар давомида севимли стилистига содиқ. Бундан ташқари, косметологи Су Маннинг тавсиясига кўра, у ҳар куни юз массажи олади.

Актриса гўзаллигининг яна бир компоненти — SPF крем. Бундай маҳсулотлар Эннинг ёшлиги ва чиннидек терисини сақлаб қолишнинг калитидир.

Кейт Миддлтон

Кейт Миддлтоннинг табиий гўзаллигига қараб, сержило сочлар ва мукаммал тери генетика натижасига ўхшайди. Ваҳоланки, хорижлик журналистлар Уэлс маликаси шахсий парвариши учун ойига 6 минг доллар сарфлаётганини аниқлаган.

Косметик брендлар орасида Миддлтон ҳашаматли нарсаларни афзал кўради. Кейтнинг маникюр ва педикюри анча арзон – ойига 600 долларгача. Шаҳзода Уильям рафиқасининг тери ранги ҳам профессионаллар меҳнати натижасидир. Бунга ойига икки марта 118 доллар сарфланади. Рўйхатда стоматологик клиникага ташриф ҳам бор. Шунингдек, Кейт учун Лондон клиникасида ҳар ҳафта ари заҳридан 350 долларлик ниқоб тайёрланади.

Женнифер Лопес

Юлдузнинг ёрқин териси косметологга мунтазам ташриф буюриш натижасидир. Жей Ло севимли муолажасидан пул аямайди, унинг асосий таркибий қисми плацентадир. Унинг таркибида терининг тикланишига ёрдам берадиган витаминлар ва оқсиллар мавжуд. Юлдуз бунга ҳафтасига 1200 доллар сарфлайди. Яна 3500 доллар бошқа гўзаллик хизматларига сарфланади. У макияж, соч турмаги, соч бўяш, маникюр, педикюр ва массаж учун тахминан 15 минг тўлайди. Женнифер кўп вақтини машғулотлар ва спорт залида ўтказиши ҳам сир эмас. У ерда у жисмоний фаолиятнинг янги турларини синаб кўради — ёгадан тортиб боксгача. 

Виктория Бекҳэм

Виктория Бекҳэм ҳам плацентанинг мухлиси. Тўрт фарзанднинг онаси плацента юз ниқобларига тахминан 650 доллар сарфлайди. Терининг радикал шикастланишининг олдини олишга ёрдам берадиган мўжизавий ингредиент тўғридан тўғри Янги Зеландиядан олиб келинади.

Дизайнер, шунингдек, узоқ вақт давомида муаммоли тери билан курашмоқда. Вики ҳафтада бир марта косметологга ташриф буюради ва ҳар бир ташриф учун тахминан 15 минг доллар сарфлайди. Ҳар олти ойда у оғриқли, аммо жуда самарали Morpheus 8 процедурасига боради — гўзаллик саноатида бу муолажа “Аппарат косметологияси оламидаги Ламборжини” деб номланади.

Аммо унинг гўзаллик тартибида ёқимли дақиқалар ҳам бор — ниқоблар, кремлар, геллар, зардоблар ва кўпиклар. Бекҳэм хоним буларнинг барчасини ҳар куни ишлатади, шунинг учун маҳсулотларни тез-тез янгилаб туриш керак. У бунинг учун ойига 5 минг доллар тўлайди, сочлар парвариши эса ойига икки минг долларга тушади. Автозагар — ҳафтасига 300 доллар, кўчага чиқиш учун макияж ва соч турмаги — 2500 доллар, маникюр ва педикюр — ойига 1000 доллар атрофида.

Мадонна

Кўплаб пластик операцияларга қарамай, Мадонна ҳам гўзаллик учун ойига жуда кўп пул сарфлайди. Бир неча йил олдин хонанда қарийб 100 минг долларга селлюлитни йўқ қиладиган аппарат сотиб олганди. Қурилма акустик тўлқин терапияси ёрдамида ортиқча ёғдан халос қилади. Бундан ташқари, уйида 15 000 долларлик терини кислород билан таъминлаш аппарати ҳам бор.

Инсайдерларнинг сўзларига кўра, машҳурнинг ёнида ҳар доим визажист ва косметолог бўлади, улар хонанда бўш қолди дегунча унинг юзига бошқа зардоб ёки ниқоб суртади, шунингдек, макияжини янгилайди. Афсонавий қўшиқчининг маникюри ва сочлари ҳам доимий равишда янгилаб турилади.