Австралиялик кино ва театр актрисаси Кейт Бланшетт Radio Times нашрига берган интервьюсида актрисалик фаолиятини якунлаш ҳақида жиддий ўйлаётганини маълум қилди.
“Бу гапни айтганимда оила аъзоларим ҳар сафар менга ишонмайди, лекин бу сафар мен жиддий айтяпман. Сўнгги кунларда ҳақиқатдан ҳам актёрликни ташлаш ҳақида ўйлаяпман”, деди икки карра “Оскар” мукофоти совриндори.
“Ҳаётимда бажаришим керак бўлган бошқа жуда кўп ишларим бор”, дея қўшимча қилди у.
Бланшеттнинг сўзларига кўра, серқирра ижодий фаолиятига қарамай, у ҳеч қачон машҳурликка кўника олмаган ва уни суратга олишларига кўникиш учун узоқ вақт керак бўлган.
Ўтган йили хабар берилишича, Кейт Бланшетт саке ичимлиги ишлаб чиқарувчи “Toku Sake” компаниясининг директори бўлган.
Бланшетт 1997 йилда ссенарист ва монтаж муҳаррири Эндрю Аптон билан турмуш қурган. Уларнинг тўрт нафар фарзанди: ўғиллари Дешиэл, Роман ва Игнатиус ҳамда қизи Эдиталар бор.
Аввалроқ Кейт Бланшетт “Узуклар ҳукмдори” трилогиясида (2001, 2002 ва 2003 йилларда ишланган) яратган образидан “ҳеч ким ҳеч қанча пул ишламаган”ини айтган эди.
Изоҳ (0)