Aktrisa Keyt Blanshett Endi Koenning Watch What Happens Live teledasturiga bergan intervyusida “Uzuklar hukmdori” trilogiyasida (2001, 2002 va 2003-yillarda ishlangan) yaratgan obrazidan “hech kim hech qancha pul ishlamagan”ini aytdi.
Ko‘rsatuvda boshlovchi aktrisadan aynan qaysi loyiha uchun eng katta gonorar olgani haqida savol berdi. Koen aktrisa “Uzuklar hukmdori” filmidagi Galadriel obrazini gavdalantirgani uchun katta gonorar olganini taxmin qildi, chunki franshiza kinoprokatida 2,9 milliard dollardan ortiq daromadga ega bo‘lgan edi.
“Hazillashyapsizmi? Yo‘q, bu loyihadan men hech qanday foyda ko‘rmaganman”, dedi Blanshett.
So‘ng boshlovchi aktrisa kassa daromadlarining biror foizini olgan yoki yo‘qligini aniqlashtirdi.
“Yo‘q! Filmni suratga olish ishlari loyiha daromadga chiqishidan ancha avval bo‘lib o‘tgan va men franshizadan hech qancha daromad ko‘rmaganman, deya javob berdi Keyt.
Blanshettning ta’kidlashicha, u Piter Jekson tomonidan suratga olingan parodiyali va qo‘rqinchli film (“Braindead”, 1992)da ishtirok etgan bir yigit bilan ishlashni istagani uchun loyihaga rozilik bildirgan.
“Men ijro etgan rolim uchun bepul sendvichlar oldim, xolos. Ayollar siz o‘ylaganchalik katta maosh olishmaydi”, deya qo‘shimcha qildi aktrisa.
Keyt Blanshett “Uzuklar hukmdori” aktyorlari franshizadan juda kam daromad olganini ma’lum qilgan birinchi aktrisa emas. 2023-yilda Legolas rolini ijro etgan aktyor Orlando Blum uchta filmdagi ishtiroki uchun atigi 175 ming dollar to‘langanini aytgan edi.
Izoh (0)