Фильм яратишда муҳим қарорлар нафақат продюсер ва режиссёрлар томонидан қабул қилинади, балки бу жараёнга бутун суратга олиш гуруҳи, шу жумладан, актёрлар ҳам жалб қилинади. Мисол учун, актёрлар ўз қаҳрамонларининг ташқи кўриниши ёки хулқ-атворида баъзи ўзгаришлар қилишлари мумкин, бу эса фильм муваффақиятини таъминлайди. Анжелина Жоли «Малефисента» фильмини суратга олиш вақтида айнан шундай қилган.
Анжелина Жоли — «Малефисента»
Анжелина Жолининг ўзи «Малефисента» фильмидаги қаҳрамони қўрқинчли кўриниши учун махсус қопламалар ёрдамида бурнининг шаклини ўзгартиришни таклиф қилади. Шунингдек, визажистлар жамоаси ҳам актрисанинг ёноқ суякларини янада бўрттиришга қарор қилишади. Бу ғоя ҳаммага ҳам ёқмайди, лекин Анжелина айнан шу нарса кераклигини тушунади. Бундан ташқари, актриса кўзларини эчкига ўхшатиб қўядиган линзаларни тақишдан бош тортмайди.
Скарлетт Йоханссон — «Қора бева»
Қора бева — сирли аёл, Йоханссон бу қаҳрамонга бағишланган фильм шунчаки унинг шаклланиши тарихи бўлишини хоҳламайди. «Образим юзаки бўлишини хоҳламадим. Мен бу фильмда суратга тушишга Қора беванинг кимлигини яхшироқ кўрсатиб бериш шарти билан рози бўлдим», — дейди у.
Картинада психологик травма ва оғриқ каби кўплаб мураккаб саволлар туғилади ва Йоханссоннинг қаҳрамони — Наташа чинакам кучли ва фидойи аёл бўлиб чиқади. Скарлетт уни ҳис-туйғулари йўқ суперқаҳрамон аёл сифатида эмас, балки оддий одам сифатида кўрсатишни хоҳлайди. «Суперқаҳрамон жанрини жиддийроқ қилишда мен ўзимга ишончсизлик, психологик комплекслар, шармандалик ва умидсизлик масалаларига тўхталишни истадим», — дейди актриса.
Дуэйн Жонсон — «Ремпейж»
Горилла ҳақидаги фильмнинг оригинал сценарийсида Жорж фильм охирида мардларча ўлиши керак эди, аммо Дуэйн дарҳол фильм охирини ўзгартириш кераклигини айтади. «Кинонинг қайғули нотада тугаши менга ёқмайди. Ҳақиқий ҳаётда бундан ҳам кўпроқ нарса бор. Якуний титрлар чиққанда, фақат ижобий ҳис-туйғуларни ҳис қилишни хоҳлайман».
Аммо режиссёр Бред Пейтон бунга рози бўлмайди. «Менимча, Жоржнинг ўлими фильмни янада драматик қилган», — дейди режиссёр.
Кейт Бланшетт — «Оушеннинг 8 дугонаси»
Фильмда Кейт Бланшетт қаҳрамонининг исми Лоу, лекин дастлаб унга актрисаникидек Кейт исми берилиши режалаштирилган. Аммо Бланшетт бунга мутлақо қарши бўлади. У шундай деди: «Дўстлар, менимча, бу унчалик тўғри эмас. Қаҳрамонни менинг исмим билан атай олмаймиз». Ёзувчилар унинг эътирозларини асосли деб топишади. Актриса ва унинг персонажи ўртасидаги ўхшашликларга қарамай, Кейт улардаги фарқларни кўрсатмоқчи эди, шунинг учун ижодкорлар Лоу исмини маъқуллашади.
Дейкр Монтгомери — «Жуда ғалати ишлар»
2-мавсумни суратга олиш жараёнида Монтгомери сериал яратувчилари — ака-ука Дафферларни ўз қаҳрамони Билли образини чуқурлаштиришга кўндириб, томошабинларга у қаттиққўл ота билан катта бўлганлигини кўрсатади. 3-мавсумда сценарийга янги қаҳрамон — Биллининг биологик онаси киритилади. Натижада томошабинлар қаҳрамонни ташлаб кетишганида қанчалик оғриқни бошдан кечирганини билиб олишди.
«Ўтган мавсумда Биллининг онаси отасидан фарқли равишда саҳна ортида қолганди. Лекин мен у ҳақида кўпроқ билишни хоҳлардим. Мен ака-ука Дафферларига ушбу персонажни киритишга рози бўлганлари ва ҳаттоки бир нечта ғояларимни инобатга олганлари учун миннатдорлик билдирмоқчиман», — дейди Монтгомери.
Эмма Коррин — «Тож»
Эмма Корриннинг сўзларига кўра, «Тож» сериалида у малика Диана касалланган булимия (руҳий касаллик бўлиб, унда бемор билмаган ҳолда кўп миқдорда озиқ-овқат истеъмол қилади) каби нозик мавзуни кўтармоқчи эди. Фильмда Диананинг руҳий ҳолатини ишончли тарзда етказиш учун бутун жамоа актрисанинг тана тили устида ишлади. Акс ҳолда, худди шу муаммога дуч келган одамлар малика тимсолини ўзлари учун ҳақоратли деб билишлари мумкин эди. «Менимча, биз бундай суҳбатлардан қочмаслигимиз керак. Диана ҳеч қачон булимия билан касалланганини яширмаган», — деди актриса.
Мавзуга доир:
- Ҳамманинг оғзида «Уэнздей»: нима учун Аддамслар оиласининг ғамгин қизи ҳақидаги сериал рекордларни янгиламоқда?
- Кинотавсия: оғир дамларда дардингизга малҳам бўлиши мумкин бўлган ажойиб фильмлар
- Актёрлар томонидан импровизация қилинган ва картинанинг култ саҳнасига айланган машҳур фильмлардаги кадрлар (видео)
Изоҳ (0)