Хорижий ОАВлар актриса Мерилин Монронинг ўлимига оид янги тафсилотларни эълон қилди. Дастлаб, у дори воситаларидан дозани ошириб юборгани сабабли вафот этган, деб қаралар эди.
Кейинчалик “Кеннедилар ва улар барбод қилган аёллар” номли китобда актриса Жон ва Роберт Кеннедилар истагига кўра ўлдирилган бўлиши мумкинлиги ҳақида тахмин илгари сурилди. Чунки вафотидан бир оз олдин у аввал Жон, кейин эса Роберт билан ишқий муносабатда бўлганди.
Radar Online нашри Федерал қидирув бюроси (ФБИ) терговининг янги тафсилотларини очиқлади. Унга кўра, Монро Жон Кеннедидан ҳомиладор бўлган. Таъкидлаш керакки, у ўша вақтда ёзувчи Артур Миллер билан турмуш қурган эди. Миллер хотинининг хиёнат қилаётганини билган, бироқ у бу ишда актёр Ив Монтандан гумон қилган.
Кеннеди билан бўлган муносабатлар доимо сир сақланган, чунки бу унинг обрўсига жиддий путур етказиши мумкин эди. У Монрони ҳомиласини олдиришга мажбур қилган ва рафиқаси билан ажрашишни истамаган. Шунинг учун у Монрони ўзининг акаси Робертга “топширган”.
Маълумотларга кўра, актриса ўлимидан аввал барча ҳақиқатни матбуотга ошкор қилмоқчи бўлган. Бу эса унинг ўлдирилишига сабаб бўлган, деган тахминлар мавжуд.
Изоҳ (0)