АҚШнинг Денвер шаҳридан Канаданинг Алберта провинциясига учаётган Boeing 737 самолётининг двигатели қуён сабаб ёниб кетди. Бу ҳақда ABC News хабар берди.
Ҳодиса 16 апрель куни United Airlines авиакомпаниясига тегишли UА2325 рейси билан содир бўлган. Парвоздан олдин қуён самолётнинг ўнг двигателига кириб қолган. Парвоз вақтида бортда кучли портлаш ва сезиларли даражада тебраниш кузатилган. Шундан сўнг двигателда ёнғин бошланган.
Самолёт бортида 153 нафар йўловчи ва 6 нафар экипаж аъзоси бўлган. Учувчилар 75 дақиқалик парвоздан сўнг самолётни фавқулодда қўндиришга мажбур бўлган. Носозлик ҳақида авиакомпанияга сигнал юборилган ва йўловчиларни манзилга етказиш учун бошқа самолёт тайёрланган.
Ҳайвон қандай қилиб двигатель ичига тушиб қолгани аниқ эмас. АҚШ Федерал авиация бошқармасига кўра, 2024 йилда ҳайвонлар билан боғлиқ 20 мингга яқин ҳолатдан атиги тўрттаси қуёнларга тўғри келган.
АҚШда самолётлар иштирокидаги сўнгги авиаҳодисалар:
5 январь Аляска яриморолида АҚШнинг F-35А қирувчи самолёти қулаб тушди. Учувчи катапульта қилишга улгурди ва тирик қолди.
30 январь куни эрталаб American Airlines йўловчи самолёти Вашингтон аэропорти яқинида ҳарбий вертолёт билан тўқнашди, сўнгра Потомак дарёсига қулади. Оқибатда ҳеч ким омон қолмади, 5 февраль куни авиаҳалокатда ҳалок бўлган барча 67 кишининг жасади Вашингтондаги дарёдан олиб чиқилди.
1 февраль куни АҚШнинг Филадельфия шаҳрида авиаҳалокат юз берди: тез тиббий ёрдам самолёти турар жой ҳудудига қулаб тушди, уйлар ва автомобилларга зарар етди.
7 февраль куни бортида 10 киши бўлган самолёт Аляскада ғойиб бўлди
11 февралда эса Аризонадаги аэропортда иккита самолёт тўқнашиб кетди. Фавқулодда вазият оқибатида бир киши ҳалок бўлди, яна уч киши жароҳат олди.
12 февралда АҚШ ҳарбий-денгиз кучларининг самолёти Сан Диэго кўрфазига қулаб тушди. Авиаҳалокат Норт Айленд ҳарбий авиабазаси яқинида юз берган. Самолёт бортида икки киши бўлган. Уларни балиқ овлаш кемаси қутқариб қолган.
19 февраль АҚШнинг Аризона штати осмонида 19 февраль куни кичик самолётлар тўқнашди, оқибатда икки киши ҳалок бўлди. Ҳар бир самолёт бортида иккитадан одам бўлган. Тўқнашув Тусон шаҳри яқинида содир бўлган. Тўқнашувдан сўнг Cessna 172 самолёти хавфсиз қўнишга муваффақ бўлган. Бироқ Lancair 360 МK II учиш-қўниш йўлаги яқинида ерга қулаб, ёниб кетган.
25 февраль Американинг Southwest Airlines авиакомпаниясининг йўловчи самолёти Чикагодаги Мидуэй халқаро аэропортига қўниш чоғида хусусий самолёт билан тўқнашишига бир бахя қолди. Йўловчи самолёти сўнгги дақиқада ҳавога кўтарилишга мажбур бўлган.
10 апрель куни Нью Йорк штатида вертолёт Гудзон дарёсига қулаб тушиши оқибатида 6 киши ҳалок бўлди. Вертолёт бортида учувчи ва испаниялик сайёҳлар оиласи бўлган: икки нафар катта ёшли ва уч нафар бола. Ҳалокат сабаблари номаълум.
Изоҳ (0)