Россиянинг энг машҳур ва муваффақиятли қўшиқчилардан бири, халқ артисти ва мусиқий саҳнада узоқ йиллик фаолиятига эга бўлган Алла Пугачёва Борисовна жорий йил 15 апрель куни 76 ёшни қарши олди.
Пугачёва ўзининг ноёб овози ва қўшиқлари билан миллионлаб юракларни забт этган санъаткор. У ҳаёти давомида нафақат кўплаб ҳит қўшиқлари билан, балки шахсий ҳаёти ва оила аъзолари билан ҳам омма эътиборида бўлган. Бугунги кунда хонанда ўз ижодий фаолиятини давом эттириб, янги қўшиқларини тақдим этишда давом этмоқда. Қуйида Алла Пугачёванинг ҳозирги ҳаёти ҳамда ижодий фаолияти ҳақида сўз юритилади.
Исроилдаги ҳаёт
Алла Пугачёва 2022 йил бошларида Россиядаги сиёсий ўзгаришлар ва шахсий хавфсизликни таъминлаш мақсадида оиласи билан Исроилга кўчиб ўтди. У янги имкониятлар, шахсий эркинлик ва болаларига яхши таълим бериш учун шундай қарорни қабул қилди. Исроилда оиласи билан Кесария шаҳрида яшай бошлади ва бу унинг ҳаётида янги босқични бошлаб берди.
Исроилнинг Рубльёвкаси деб аталадиган Кесария шаҳрида юлдузли оила катта уйни ижарага олган. Мулк Максим Галкиннинг укасига тегишли. 2023 йилда эса унинг уйида ўғирлик содир бўлгани ҳақида хабарлар пайдо бўлди. Алла бу хабарга ижтимоий тармоқларда изоҳ берди:
“Ҳашаматли саройимга ўғри тушгани ҳақида хабар ўқиганимда хаёлимга келган биринчи ўй шундай бўлди: бундай хабарларни ёзаётган ва тарқатаётган инсонларнинг ақли жойида эмас. Биринчидан, мен ҳозир бошқа ерда яшайман, иккинчидан эса, уйимга ўғри тушгани йўқ”, дея норозилик билдирди.
Далаҳовлисини сотмоқда
Россия ОАВларига кўра, 2023 йил баҳорида Пугачёвага қарши суд иши очилган. Аниқланишича, Истрадаги соҳил бўйида жойлашган уйнинг ижара ҳақи ўз вақтида тўланмаган. Уй-жой эса Примадоннанинг набираси Никита Пресняков номига ўтказилган. Сўнг Алла Борисовна жаримани тўлаган, кейинчалик бу уйнинг сотилиши ҳақида хабарлар тарқалган.
Қўшиқлар ёзишда давом этмоқда
Россияда яшаган даврида хонанда узоқ вақт давомида қўшиқлар чиқармаганини ва ўзининг хонандалик фаолиятини тугатиши мумкинлигини айтган эди. Аммо кўчиш янги ижодлар учун илҳом манбаига айланди. 2024 йилда Пугачёва “П.С.” номли альбомни чиқариб, ўзининг эски юбилей концертида янграган қўшиқларини жамлади. 2025 йилда эса у икки та янги қўшиқни тақдим этди.
Иврит тилини ўрганмоқда
Ҳозирги кунда Алла Пугачёва ва унинг фарзандлари фаол равишда иврит тилини ўрганмоқдалар. Бунинг учун юлдузли оила профессионал ўқитувчилар ёрдамига мурожаат қилишган.
Қизи Кристина Орбакайте билан камдан-кам кўришади
Россиядан кетганидан сўнг Алла Борисовна оила аъзолари билан камдан-кам учраша бошлади. Хонанда баъзан қизи Кристина Орбакайте (у АҚШда яшайди) билан Юрмала ёки Исроилда учрашиб туради.
Фарзандларини нуфузли мактабга берган
Лиза ва Гарри Исроилда ўқишни давом эттирмоқда. Россияда улар Москва яқинидаги математика ва хорижий тиллар чуқурлаштирилган гимназиясида таҳсил олишган. Ҳозирда ҳам улар ўша ерда ўқишмоқда, фақат дарслар энди онлайн шаклда ўтказилмоқда. Бундай таълим орқали болалар келажакда Россия аттестатини олиш имкониятини сақлаб қолади.
Бундан ташқари, Лиза ва Гарри Исроилдаги энг нуфузли мактаблардан бири бўлган Америка халқаро гимназиясида ҳам ўқимоқда. Ушбу ўқув юртини тамомлаганлар АҚШ ва Европанинг энг яхши университетларига кириш имкониятига эга бўлади. Мактабда таълим инглиз тилида олиб борилади.
Маълумот учун: Алла Пугачёва Михаил Ипполитов-Иванов номидаги мусиқа мактабида ўқиган. 1966 йилда шу ўқишнинг хор-дирижор бўлимини тамомлаган. Кейинчалик, 1981 йилда Анатолий Луначарский номидаги давлат театр санъати институти (ҳозирги ГИТИС)нинг “Эстрада режиссураси” мутахассислигини битирган.
У 16 ёшлигида Умумиттифоқ радиосининг “Хайрли тонг” дастури учун “Робот” қўшиғини ёзган, бир йил ўтгач эса “Ёшлик” радиостанцияси жамоаси билан бирга Ғарбий Сибир бўйлаб ўзининг дастлабки гастрол сафарига отланган. У яккахон ижодкор бўлишидан аввал “Новий электрон”, “Москвичи”, “Ритм” каби кўплаб жамоалар билан бирга қўшиқ куйлаган. Ўз ижодий фаолияти давомида Алла Пугачёва қўшиқлари ёзилган юздан ортиқ пластинкалар, CD ва DVD дисклар чиқарган.
Изоҳ (0)