Россиялик таниқли хонанда, Украинадаги «махсус операция»ни очиқчасига танқид қилиб келаётган Алла Пугачёванинг невараси Никита Пресняков сафарбар қилинди, дея хабар бермоқда «5-tv.ru» ўз манбаларига таяниб.
У Москванинг Губернский театрида репетиция чоғида ҳарбий комиссариатга олиб кетилган.
Кейинроқ Москва Губернский театри қўшиқчининг сафарбар этилгани ҳақидаги хабарларни рад этди.
«Никита Пресняков ушбу театрда таклиф этилган артист сифатида фаолият юритади, у штатда мавжуд эмас ва фақат спектакль бўладиган кунда репетицияларга келади. Унинг иштирокидаги бундан аввалги спектакль 21 сентябрда бўлиб ўтганди. Шунинг учун буларнинг барчаси ҳақиқатга тўғри келмайди», — дейилади театр матбуот хизмати хабарида.
Никита Пресняков 31 ёшда, у Россияда хизмат кўрсатган артист Кристина Орбакайте ва қўшиқчи Владимир Пресняковнинг ўғли. Унинг бувиси — СССР халқ артисти Алла Пугачёва. У 29 сентябрь куни кенжа фарзандлари билан бирга хусусий самолётда Россияни тарк этганди.
Кейинроқ у Исроил паспортини олгани, Россиядаги қасрини эса сотувга қўйгани хабар берилди. Шунингдек, унинг қўшиқлари радиотўлқинлардан олиб ташланди.
20 сентябрь куни куни хонанданинг устидан шикоят тушганди. Бунга сабаб эса Пугачёва Россия Адлия вазирлигидан эри Максим Галкин ва ўзини «хорижий агент» деб эълон қилишни сўраган. У ўз Instagram’ида эрини «Россиянинг ҳақиқий ватанпарвари» деб атаб, «тинч ҳаёт, сўз эркинлиги» ва «йигитларнинг хаёлий мақсадлар йўлидаги ўлимига чек қўйилишини» тилаган эди.
Россия Украинага бостириб киргач, бир қатор санъаткорлар урушга қарши чиқди, уларнинг айримлари Россияни тарк этди. Уруш ва Путинни танқид қилган артистлар деярли дарҳол концертлари бекор қилиниши ҳолатига дуч келди. Уларнинг бир қатори эса «хорижий агентлар» рўйхатига киритилди.
Максим Галкин санъаткорлар орасида биринчилардан бўлиб Украинадаги вазият бўйича ўз фикрларини билдирган. У телевидениеда «махсус операция» тўғрисида янгиликлар ҳаддан ташқари кўпайиб кетганини айтган. Бундан ташқари, Россия телеканалларидаги цензура ҳамда президент Владимир Путин сиёсатини танқид қилган. Бундан ғазабга келган айрим одамлар уни ватан хоинига чиқарган ва Галкиннинг Архангелск шаҳрида ўтиши режалаштирилаётган концерти бекор қилинган.
Охир-оқибат Алла Пугачёва ҳамда Максим Галкин эгизак фарзандларини олиб, Исроилга жўнаб кетганди. Август охирида эса Пугачёванинг ўзи фарзандлари билан Россияга қайтиб келди.
Сентябрь бошида Россия президенти матбуот котиби Дмитрий Песков биринчи марта Путинни ва Украинадаги урушни танқид қилувчи санъаткорларга муносабат билдириб, Пугачёвага президент «жуда яхши» муносабатда эканини айтганди. «Улар бир-бирини билади, улар таниш, бир неча марта учрашишган», — деди Песков.
Изоҳ (0)