Қўшиқчи Земфира 11 октябрь куни Тель-Авивдаги концертида Алла Пугачёва билан кўришганини маълум қилди. Бу ҳақда у Instagram орқали гапириб берди ва Пугачёва билан бирга тушган суратини жойлади.
«Алла Борисовна концертга келди, мусиқачиларни мақтади, менга саҳнада ёш боладай кўринишимни айтди. Мен эса бунга жавобан айтмоқчиманки — сиз зўрсиз. Буюклигингизга шубҳа йўқ. Мусиқани қандай ҳис қилишимиз муҳим эмас, иккаламиз ҳам ўз мамлакатимиз хонандаларимиз», — деб ёзди у.
9 октябрь куни Земфира Бордерлине альбоми билан Европа бўйлаб концерт турини бошлади. Лимасолда бўлиб ўтган илк концертида у Украинадаги уруш ҳақида биринчи марта очиқ гапирди. «Ҳар куни уруш тугасин, мамлакатим бу урушни тўхтацин, деб дуо қиламан», — деди.
24 февраль — Россия Украинага бостириб кирган куни Земфира беш йил ичида биринчи яккахон концерти билан Москвада чиқиш қилган эди. Унда тўғридан-тўғри урушга қарши баёнотлар янграмаган, лекин ўша куни ижрочининг сайтида ва ижтимоий тармоқларида «Урушга йўқ» ёзуви пайдо бўлган. Хонанда 26 февраль куни Москвада навбатдаги концерт дастурини тақдим этди. Шундан сўнг, Земфира Россияни тарк этиб, Парижга кўчиб ўтгани маълум бўлди.
Март ойида Земфира «Ўқ узманг» қўшиғига Украинадаги жанговар ҳаракатлар акс этган клип эълон қилди, май ойида у урушга ишора қилувчи янги «Гўшт» қўшиғини тақдим этди. Европа гастроли бошланишидан олдин «Лукадан Земфира» мини-альбоми чиқарилди, унинг матнларида урушга ишоралар бор.
Алла Пугачёва Россияни тарк этди
Алла Пугачёва 29 сентябрь куни кенжа фарзандлари билан бирга хусусий самолётда Россияни тарк этганди.Кейинроқ у Исроил паспортини олгани, Россиядаги қасрини эса сотувга қўйгани хабар берилди. Шунингдек, унинг қўшиқлари радиотўлқинлардан олиб ташланди.
20 сентябрь куни куни хонанданинг устидан шикоят тушганди. Бунга сабаб эса Пугачёва Россия Адлия вазирлигидан эри Максим Галкин ва ўзини «хорижий агент» деб эълон қилишни сўраган. У ўз Instagram’ида эрини «Россиянинг ҳақиқий ватанпарвари» деб атаб, «тинч ҳаёт, сўз эркинлиги» ва «йигитларнинг хаёлий мақсадлар йўлидаги ўлимига чек қўйилишини» тилаган эди.
Россия Украинага бостириб киргач, бир қатор санъаткорлар урушга қарши чиқди, уларнинг айримлари Россияни тарк этди. Уруш ва Путинни танқид қилган артистлар деярли дарҳол концертлари бекор қилиниши ҳолатига дуч келди. Уларнинг бир қатори эса «хорижий агентлар» рўйхатига киритилди.
Максим Галкин санъаткорлар орасида биринчилардан бўлиб Украинадаги вазият бўйича ўз фикрларини билдирган. У телевидениеда «махсус операция» тўғрисида янгиликлар ҳаддан ташқари кўпайиб кетганини айтган. Бундан ташқари, Россия телеканалларидаги цензура ҳамда президент Владимир Путин сиёсатини танқид қилган. Бундан ғазабга келган айрим одамлар уни ватан хоинига чиқарган ва Галкиннинг Архангелск шаҳрида ўтиши режалаштирилаётган концерти бекор қилинган.
Охир-оқибат Алла Пугачёва ҳамда Максим Галкин эгизак фарзандларини олиб, Исроилга жўнаб кетганди. Август охирида эса Пугачёванинг ўзи фарзандлари билан Россияга қайтиб келди.
Сентябрь бошида Россия президенти матбуот котиби Дмитрий Песков биринчи марта Путинни ва Украинадаги урушни танқид қилувчи санъаткорларга муносабат билдириб, Пугачёвага президент «жуда яхши» муносабатда эканини айтганди. «Улар бир-бирини билади, улар таниш, бир неча марта учрашишган», — деди Песков.
Изоҳ (0)