“Истедим”ни ўзбеклар машҳур қилди”. Роза Зергерлининг Ўзбекистондаги илк концерти қандай ўтмоқда?

Озарбайжонлик хонанда Роза Зергерлининг “Истедим” номли таронаси қисқа фурсатда Ўрта Осиёда хит даражасига етди. Биргина қўшиғи орқали оламшумул машҳурликка эришган хонанда14-15 апрель кунлари Тошкентнинг муҳташам “Халқлар дўстлиги” саройида ўзининг илк яккахон концерт дастурини ўзбек тингловчиларига жонли ижрода тақдим этяпти. “Дарё” жамоаси концертдан махсус репортаж тайёрлади.

Концерт хонандани машҳур қилган “Истедим” композицияси билан бошланди. Хит таронадан сўнг Розахоним ўзбек мухлислари билан саломлашиб, уларни кўришдан мамнунлигини айтди.

Ушбу концерт озарбайжонлик хонанданинг Ўзбекистондаги илк концерти бўлди. Шунга қарамай, санъат саройи ўзбек ва бошқа миллатга мансуб мухлислар билан тўлди.

— Кўп давлатларда концерт берганман, лекин Ўзбекистонда биринчиси бўлди. Концертдаги ҳар бир гапимни мухлислар диққат билан тинглади ва шунга яраша олқишлар ҳам олдим. Мен фаррошдан тортиб режиссёргача бугунги кун учун миннатдорман. Эрталабдан буён мен билан бўлишди, дизайнерим Туркиядан тезкор рейс билан етиб келди, дейди хонанда концертдан сўнг берган интервьюсида.

Роза Зергерли концертда икки тилда мулоқот қилди. Озар тили туркий халқлар учун бегона эмаслиги сабаб ўзбек мухлислари унинг сўзларини яхши тушунди.

— Таассуротларим аъло даражада. Ўзбекистондаги илк яккахон концертим “Халқлар дўстлиги” саройида бўлиб ўтяпти. Концертимга ташриф буюрган ҳар бир инсондан миннатдорман.

Концертга ҳозирлик кўраётганимизда грим ва бошқа ташкилий масалалар туфайли соат 20:00 да бошлаймиз дейишди. Концерт бошланиш вақти 19:00 деб ёзилгани билан бир соат кечроқ бошлаймиз, бизда ҳамма бир оз кеч қолиб келади, дейишди (кулиб). Лекин соат 19:00 да зал тўлганди, тезроқ бошлайлик, деявердим. Мухлислар мен учун тўплангани катта бахт. Ўзбекистон менинг иккинчи ватаним. Чунки “Истедим” қўшиғим аввал Ўзбекистонда, сўнг Қозоғистонда хит бўлди ва дунё топ-чартларидан биринчиликни эгаллади”, дейди хонанда интервью давомида самимият билан.

Концертга Ўзбекистон ва Озарбайжон халқ артисти Фаррух Зокиров ҳам ташриф буюрди ва саҳнада Роза билан бирга куйлади. Афсонавий санъаткор Зергерли билан турли маданий тадбирларда учрашган ва ижодига бефарқ эмаслигини айтган.

Концерт сўнгига яқин Розахоним учун тикилган махсус чопон саҳнага олиб чиқилди. У шу чопонда Ўзбекистон ва Озарбайжон халқ артисти Насиба Абдуллаеванинг “Бари гал” қўшиғини жонли ижрода куйлади. Бу хонанданинг ўзбек тилидаги илк қўшиғи бўлди ва тингловчилар томонидан илиқ баҳоланди. Барча унга жўр бўлди ва рақсга тушди. Зергерли нега айнан бу қўшиқни танлагани ҳақида ҳам сўзлаб берди.

— Ростини айтсам, биз ўнта ўзбекча қўшиқнинг ичидан биттасини танлаб оламиз ва мен шуни ўзбек тилида айтаман, деб мўлжаллаб қўйгандик. Ўзбекистондаги гала-концертлардан бирида “Бу ердаги илк яккахон концертимда ўзбек тилида қўшиқ куйлашга ваъда бераман” деб айтгандим. Шундан сўнг кўпгина таклифлар тушди. Давлат тадбирларининг бирида Насибахоним Абдуллаева билан учрашганимда “Насибахоним, менга қўшиқ танлашда ёрдам беринг. Сиз шу ерда яшайсиз, халқнинг дидини биласиз” дедим. У менга истасам “Бари гал”ни куйлашимни айтди. Мен унгача “Бари бах”ни куйлашни ўйлаётгандим. “Бари гал”ни Насибахоним куйлагани учун танладим.

Озарбайжонлик хонанда сифатида ўзбекчада соф куйладим, деб ўйлаяпман. Менга ён-атрофимдагилар “Сиз ўзбек тилида идеал даражада куйладингиз” дейишди. Барча ўзбеклар устимдан кулмасин, менга қандай куйлаётганимни айтинглар, деганимда ҳам идеал даражада куйлаётганимни айтишди”, дейди Роза Зергерли.

Репортажни тўлиқ ҳолда Дарё Lifestyle YouTube каналида томоша қилишингиз мумкин.