Россия қўшинларининг Украинага кенг кўламли босқини бошланганидан кейин Россиядан Исроилга кўчиб ўтган қўшиқчи Алла Пугачёва Москвага қайтиб келди. Ушбу маълумотни 3 ноябрь куни эрталаб Пугачёванинг ёрдамчиси Елена Чупракова “ТАСС” агентлигига тасдиқлади.
2 ноябрь оқшомида “РИА Новости” ва База нашрлари манбаларга таяниб, Пугачёва Псков вилоятидаги чегара пункти орқали Россияга кирганини хабар қилганди.
Пугачёванинг ёрдамчиси хонанданинг Москвага нима сабабдан келганини ошкор этмади. Хонанда Москвада қанча вақт ўтказишни режалаштираётгани ҳақидаги саволга Чупракова “бу номаълум” деб жавоб берди.
Алла Пугачёва турмуш ўртоғи Максим Галкин “хорижий агент” деб эълон қилинганидан кўп ўтмай Россияни тарк этганди.
Пугачёва турмуш ўртоғини қўллаб-қувватловчи пост эълон қилиб, унда ўзини ҳам “суюкли мамлакатининг хорижий агентлари” қаторига киритишни сўраган. Пугачёва Россиянинг ватанпарвари бўлган турмуш ўртоғи билан бирдам эканини билдириб, ўз мамлакатига “тинч ҳаёт” ва “хаёлий мақсадлар учун” одамларнинг ўлимига чек қўйишини тилашини айтган. Хонанданинг пости юз минглаб лайк тўплаган. Кўп ўтмай у Максим Галкин билан Исроилга яшаш учун кетганини эълон қилди.
ҲАМАСнинг Исроилга ҳужумидан сўнг Максим Галкин видео эълон қилди, унда Галкин “Алла Пугачёва билан ўзимизни шу ерга тегишлидек ҳис қиламиз, шундай бирлашган халқнинг бир қисми эканимиздан фахрланамиз ва кетиш ниятимиз йўқ” деб айтган.
Хабар қилинишича, Алла Пугачёва Россияга Максим Галкинсиз келган.
Изоҳ (0)