Хонанда Ирода Искандарова «Севимли» телеканалининг «Ўзим» кўрсатувига берган интервьюсида санъатга кириб келиши, турмуш қургандан кейинги қийинчиликлари ва ажрашгани, фарзандларининг санъат соҳасини танламаганидан ранжигани ва ҳомийи бўлмагани ҳақида гапириб берди.
«Онамнинг олдида юриб, ўзим доира чалишни ўрганганман»
Дадам санъатни жуда яхши кўрар эди, онам ҳам шифокор бўлишига қарамасдан халфачилик билан шуғулланган. Ёшлари катта бўлса ҳам, қўшиқнинг бирор ерини хато айтсам, мана бу ерини хато кетибди, деб айтиб турарди. Биринчи катта танқидчим — онам. Ўша пайтда пластинкалар бўлар эди, дадам Алла Пугачёвани яхши кўрар эди, мен ҳам тилим чиқмасдан ўша хонанданинг «Миллион алих роз» таронасини айтиб юрган эканман. Ёшлигимдан санъатга меҳр ривожланган. Онамнинг кўзи ожиз устозлари бўлар эди, бир йил давомида улардан дарс олганларида мен ҳам қўшилиб борганман.
Онам билан бирга бориб, чолғуларни қандай чалиш, қанақа қилиб қўшиқ айтиш кераклигини кўриб ўтирганман. Ўша аёл бир-икки соатлаб дарс берарди. Онамнинг оиласида санъаткорлар бўлган, ўша даврда Рўзметовалар деган оилавий ансамбл бўлган. Кичкина қизча бўлсам ҳам қатнашганман, онамнинг олдида доира чалганман. Онамнинг дадаси рухсат бермаган, бироқ дадам буни тушунган ҳолда индамаган, чунки халифалар фақат аёлларнинг даврасида қўшиқ айтган, доирачиси ҳам, раққосаси ҳам аёл киши бўлган. Онамнинг олдида юриб, ўзим доира чалишни ўрганганман.
«Онамнинг кўзида ёш, овози бўғилиб қолган, бироқ тўйни ўтказиш керак эди»
Бизнинг пайтимизда микрафон бўлмаган, тўйга борганмиз, катта далада қўшиқ айтиб, онамнинг овози бўғилиб қолган. Кейин менга айт деганлар, мен эса айтолмайман, уяламан деб гапирганман. Онамнинг кўзида ёш, овози бўғилиб қолган, бироқ тўйни ўтказиш керак эди. Қанақа айтганимни билмайман, доиранинг ичида айтиб кетганман. Ҳар битта ашулаларини айтганман, тўй жуда ҳам чиройли ўтган. Кейин онам гармон чалишни ўрганасан деб айтган. 7-синфда ўқир эдим, онамга иккита хизмат келса, битта хизматга мен борардим. Битта укам менинг олдимда, бошқаси эса онамнинг олдида доира чалар эди. Сингилларим ҳам халифа бўлган.
«Бу нарсани тасвирлаб бера олмайман, турмуш қурганимдан кейин синдим»
Турмуш қурганимиздан кейин саҳнага чиқасан, деб ваъда беришган. Ўша пайтда Ирода Искандарова бўлиб эмас, «Ирода халфа» деса мени бутун Хоразм танир эди. Бир-икки марта саҳнага чиққанимдан кейин рухсат бўлмаган. Ота-онам мени қўллаб-қувватлар эди, чунки ўша пайтда атрофимда фақат оилам бўлган. Бу нарсани тасвирлаб бера олмайман, турмуш қурганимдан кейин синдим. Шунақа қийин дамларни бошдан кечирганман, пешонамда бу нарсалар ҳам бор экан. Кейин бўлмади, вақт ўтиб ажрашиб кетдик.
Хонанда фарзандлари унинг соҳасини танламаганидан ранжигани ҳақида
Ҳамма фарзандларим санъатга қизиқади, барчасида истеъдод бор. Бироқ болаларимдан хафаман, улар бошқа-бошқа касбни танлашди. Хафа бўлишим ҳам ноўрин, улар ҳам кўришяпти. Инсонни бир ўзи ҳеч нарса қила олмайди, чунки ҳаётнинг паст-баландликлари бўлар экан.
Кўп йўқотишлар, алдашлар, хиёнатлар бўлди. Майли, бу ҳам пешонамда бор экан, мен учун дарс бўлди. Ҳозир ёлғон билан ростни ажратадиган бўлдим.
«Ҳаммасини ўзимнинг пулимга қилганман, менинг атрофимдагилар фақат пул ишлаган»
Менда продюсер бўлмаган, концертларни ҳам ўзим қилганман. Ҳаммасини ўзимнинг пулимга қилганман, менинг атрофимдагилар фақат пул ишлаган. Ростини айтсам, менда шу пайтгача ҳеч қанақа ҳомий ҳам бўлмаган. Ҳозир продюсерлик, ҳомийлик ривожланиб кетди. Ўша пайтда ҳам бор эди, бироқ мен ҳеч қачон бировдан қарз олиб, ишламаганман. Яхши ижод қилиб, яхши асарларни олиш учун кўп алданганман.
Пулини бериб қўйиб, эртаси куни бошқаси ўша ашулани айтган ҳолатга кўп дуч келганман. Нимага десак, ўзи еттита нотадан иборат бўлади, ўхшайди, деб қўйишади. Пули тўланган, шеър ҳам ёздирилган, шундан кейин қандай қилиб у ашулани айтиш мумкин? Роса хафа бўлганман, лекин бировнинг кўнглини оғритмаганман.
Изоҳ (0)