Саломатликни, унинг етарли даражада парвариш қилинаётганини қалин ва сержило сочлардек ҳеч нима акс эттиролмайди. Қуйида сочларингиз бетакрорлигини оширишга ёрдам берадиган бир нечта озиқ-овқат маҳсулотлари келтирилган.
Агар соч тўкилиши ёки толалари ингичкалашаётгани кузатилса, билингки, бу таомномангиз билан боғлиқ муаммоларнинг олдини олиш учун калит бўлиши мумкин. Соч тўкилиши коронавирус оқибатларидан бири бўлса, истеъмол қилаётган озиқ-овқатлар рўйхатини қайта кўриб чиқинг. Соч ўсишига ёрдам берадиган ва ташқи кўринишини яхшилайдиган “суперфуд”лар етарлича топилади. Булар соч фолликулаларини мустаҳкамлайдиган антиоксидант флавоноидлар, қизил қон таначаларини кўпайтирадиган темирга ҳамда соч ўсишини яхшилайдиган оқсил ва кремнийга бой озиқ-овқатлардир.
Кўкатлар
Ҳар қандай ошкўклар, масалан, шивит, исмалоқ, карам ҳам соч фолликулаларини мустаҳкамловчи, соч оқсили бўлган кератин моддасини ишлаб чиқаришга ёрдам беради. Шунингдек, салат барги B, А, C ва К витаминларига, фолий кислотасига бой. Ҳар куни салат ёки овқатга аралаштириб тахминан 100 грамм миқдорида кўкат истеъмол қилинг.
Дуккакли маҳсулотлар
Дуккаклилар ва соядан олинган маҳсулотлар дигидротестерон деб аталадиган гормон ишлаб чиқаришни ҳосил қилади, бу мувозанат сочларнинг тўкилишига ёрдам беради. Дуккаклилар таркибида темир, магний, омега-3 ва B2 витамини мавжуд. Ҳафтада камида 75 г дуккакли экинлардан истеъмол қилишга ҳаракат қилинг, умуман олганда, дуккакли ўсимликларни таомномага кўпроқ киритган яхши, чунки улар калорияси паст, аммо тўйимли озуқа ҳисобланади.
Денгиз ўтлари
Денгиз маҳсулотларидаги айрим озиқ моддалар, масалан, темир ва аминокислота л-лизин, соч ўсишига бевосита таъсир қилади. Темир қизил қон таначаларининг соғлом ишлаб чиқарилишини таъминлайди, л-лизин моддаси эса ўз навбатида темирнинг организмга сўрилишига ёрдам беради, унинг етишмаслиги соч тўкилишига олиб келиши мумкин. Таркибида рух, фолий кислотаси, магний, B2 ва B5 витаминлари ҳам мавжуд. Озиқланиш эҳтиёжларини қондириш учун кунига 10 грамм денгиз ўтлари истеъмол қилинг.
Тухум
Протеинга бой тухум коллаген ишлаб чиқаришни кўпайтиради, бу эса сочларнинг табиий кўринишини сақлаб қолади. Ёш ўтиши билан коллаген тезроқ парчаланади, оқибатда соч толаси янада заиф ва мўртлашиб боради. Тухум таркибида А ва D витаминлари, каротин, лутеин, рух ва оқсил ҳам мавжуд. Кутилган натижага эришиш учун ҳафтасига 4 марта қайнатилган ёки қовурилган тухум еб туринг.
Авокадо
Авокадо таркибида E витамини, калий, омега-9, B витаминлари ва фолий кислотаси мавжуд. E витамини кислороднинг сўрилишини оширади, бош терисида қон айланишини яхшилайди, бу эса сочларнинг соғлом ўсишига ёрдам беради. Таъсирини сезиш учун ҳафтасига 2-4 марта 1 тадан ўртача катталикдаги авокадо истеъмол қилинг.
Зиғир уруғи
Таркибида омега-3 моддаси кўплиги туфайли зиғир уруғи сочларни озиқлантиришга ёрдам беради, соч толаларининг қуриб қолиши, заифлашиши ва мўртлашишини олдини олади. Шунингдек, ушбу маҳсулот таркибида B1 витамини, магний, фосфор ва селен мавжуд. Кунига 1 ош қошиқ миқдоридаги зиғир уруғини қўшимча сифатида ёки таомга сепган ҳолда истеъмол қилинг.
Қовоқ уруғлари
Протеинга бой қовоқ уруғлари таркибида рух мавжуд бўлиб, у соғлом ҳужайралар кўпайишини қўллаб-қувватлайди, иммунитетни оширади, бу эса сочларнинг тез ўсишига ёрдам беради. Шунингдек, қовоқ уруғи таркибида темир, фосфор, магний, оқсил мавжуд. Тўйимли витаминлар учун зиғир ва қовоқ уруғларини тенг нисбатда аралаштириб, кунига 1 ош қошиқдан ейишни одат қилинг.
Ўрмон мевалари
Кўпгина резаворлар таркибида C витамини ва калий мавжуд. Ўрмон меваларидаги C витамининг кўплиги коллаген ишлаб чиқаришни рағбатлантиради. C витамини бош терисида қон айланишини яхшилайди ва унинг антиоксидант таъсири фолликулаларни шикастланишдан ҳимоя қилади. Optimaл натижага эришиш учун ҳар куни камида бир ҳовуч резавор меванинг овқатланиш ратционида бўлиши тавсия этилади.
Манго
Манго таркибида сочларни мустаҳкамлаш ва ўсишига ёрдам берадиган бириктирувчи тўқима компоненти бўлган минерал кремний мавжуд. Кремний диоксидидан ташқари, бу мева А, B6 ва C витаминлари ва фолий кислотасига бой. Ушбу маҳсулотнинг афзалликларидан баҳраманд бўлиш учун овқатдан кейин ёки қўшимча сифатида 2 бўлакдан манго мевасини истеъмол қилинг.
Анжир
Анжир сочнинг соғлом ўсиши сержило кўриниши учун зарур бўлган темирнинг бебаҳо манбаидир. Бундан ташқари, у калий, магний, А ва E витаминларини ўз ичига олади. Қуритилган мевалар ва резаворлар таркибида ҳам темир моддаси етарлича учрайди. Мавсумда кунига икки донадан анжир истеъмоли сочлар учун кони фойда ҳисобланади.
Мавзуга доир:
Изоҳ (0)