Актёр Уилл Смит ва рафиқаси Жада Пинкэттнинг ўғли Жейден Смит 2025 йилги Гремми мукофотларини топшириш маросимига ноодатий образда ташриф буюрди. Унинг кўриниши ижтимоий тармоқларда кескин муҳокама ва масхаралар марказига айланишига сабаб бўлди.
26 ёшли Жейден 2 февраль куни Лос-Анжелесда Гремми мукофотини топшириш маросимида иштирок этди. Рэпер тадбирга оқ кўйлак ва галстук, Louis Vuitton брендига тегишли смокинг ва кроссовкаларда намоён бўлди. Унинг образини ғайриоддий қора қаср кўринишидаги бош кийими тўлдириб турар эди. Интернет фойдаланувчилари эса унинг бундай кўринишдаги “шляпа”сини кескин масхара қила бошлади:
“Йигитча боғчадаги тадбирга келган ёш болага ўхшайди”, “Мукофотга сазовор бўлган юлдузларнинг авлоди кундан-кунга ғалати бўлиб боряпти”, “Бу бола ҳам, унинг бутун бошли оиласи ҳам жиддий психологик ёрдамга муҳтож”, “Концертда унинг ортида ўтирмаган бўлар эдим” дея изоҳлар қолдиришди.
2025 йилги Гремми мукофотларида Жейден ва унинг синглиси Уилоу оталари Уилл Смитни қўллаб-қувватлаш мақсадида иштирок этди. 2022 йилги “Оскар” маросимида Уилл Крис Рокка тарсаки туширгани учун уч йилга Голливуднинг қора рўйхатида қолган эди. Ҳозирда эса актёр ушбу мусиқа маросимининг бошловчиларидан бири сифатида саҳнага қайтмоқда.
Изоҳ (0)