Буюк Британия ташқи ишлар вазири Дэвид Кэмерон яқинда Марказий Осиё бўйлаб сафари учун 42 миллион фунт стерлинг турадиган (52 миллион доллардан зиёд) ҳашаматли jet’ни ижарага олгани учун танқидга учради. Бу ҳақда The Guardian хабар берди.
Ташқи ишлар вазири ўтган ҳафтада Embraer Lineаgе 1000 самолётида Тожикистон, Қирғизистон, Ўзбекистон, Туркманистон, Қозоғистон ва Мўғулистонга беш кунлик ташриф билан келди. Самолётни бошқарадиган Union Aviation чартер фирмасига кўра, бортда вино танлашда ёрдам берилади ва “талабчан йўловчилар”га мос овқат менюси тақдим этилади.
Самолётнинг бошқа хусусиятлари қаторида шахсий овқатланиш столи, шунингдек, кенгайтирилган диванлар билан алоҳида дам олиш зонаси бор.
“Баъзида бундай сафарда вазирлар режадан ташқари рейслардан фойдаланиши керак бўлади ва агар ҳукуматнинг махсус RAF jet’лари бўлмаса, улар самолётни ижарага олиши мумкин. Лекин бу ташқи ишлар вазирини Марказий Осиё бўйлаб парвоз қилишда бозордаги энг қиммат, энг ҳашаматли хусусий самолётлардан бирини ижарага олишини оқламайди.
Бу ҳаддан зиёд исрофгарчилик. Улар давлат хизматчилари ва солиқ тўловчиларнинг пулларидан иложи борича тежамкорлик билан фойдаланиши керак. Британия жамоатчилиги ҳисобига опа-сингил Кардашьянлар сингари дунё бўйлаб саёҳат қилиш керакмас”, — деди Лейбористлар партияси вакили Эмили Торнберри.
Бунга жавобан Ташқи ишлар, ҳамдўстлик ва тараққиёт идораси вакили Кэмероннинг ташрифига қанча маблағ сарфланиши инобатга олинишини айтди.
“Унинг ташқи ишлар вазири сифатидаги иши Британия манфаатларини амалга ошириш учун чет элга саёҳат қилишни талаб қилади. Барча саёҳатда нарх ва сифат нисбати инобатга олинади. Харажат шаффофлик мақсадида мунтазам равишда эълон қилинади”, — дейди аноним вакил.
Кэмероннинг Тошкентга ташрифи
23 апрель куни Британия ташқи ишлар вазири ўзбекистонлик ҳамкасби Бахтиёр Саидов билан учрашди. Учрашувда барча соҳалар бўйича икки томонлама алоқаларни мустаҳкамлашга қаратилган асосий вазифалар белгилаб олинди.
Шунингдек, таълим соҳасидаги ҳамкорликни ривожлантиришга ўзаро тайёрлик қайд этилди. Музокаралар якунида Кенг қамровли шерикчилик тўғрисидаги декларация, Минтақавий ва халқаро боғлиқлик ҳамда инфратузилма соҳаларидаги ҳамкорлик тўғрисидаги англашув меморандуми имзоланди.
Шу куни Кэмерон Олий Мажлис Сенати раиси Танзила Норбоева билан ҳам учрашув ўтказди. Суҳбат давомида яшил иқтисодиётни ривожлантириш соҳасида қўшма лойиҳаларни йўлга қўйиш, иқлим ўзгариши оқибатларига қарши курашда ўзаро ҳамкорликни кучайтириш муҳимлиги айтилди.
Дэвид Кэмерон Ўзбекистонда инсон ҳуқуқларини таъминлаш, хусусан, муносиб меҳнат тамойилларини жорий этиш, гендер тенгликка эришиш, оилавий зўравонликка қарши курашиш борасида ижобий ишлар амалга оширилаётганини алоҳида қайд этди.
Изоҳ (0)