Қозоғистон Коррупцияга қарши кураш хизмати судланган тадбиркор Қайрат Сатибалди 650 миллиард тенге (1,4 миллиард доллар) маблағни давлатга қайтарганини маълум қилди, деб ёзмоқда Tengrinews.
Хизмат расмий вакили Арман Тлеукановнинг айтишича, Қайрат Сатибалдига нисбатан жиноий йўл билан олинган даромадларни легаллаштириш бўйича 218-модда 3-қисми бўйича судга қадар тергов ишлари якунланган.
“Қайрат Сатибалди жиноий йўл билан олинган маблағлар ва ноқонуний пуллардан фойдаланган ҳолда, жумладан, чет элда турли мулкка эга бўлган, Қозоғистон ва хориждаги банклардан пул олган, бу иш ҳозир судда кўрилмоқда.
Солиқ тўлашдан бўйин товлаш бўйича яна бир эпизод қайд этилган бўлиб, мазкур ҳолат юзасидан судга қадар тергов ҳаракатлари олиб борилмоқда. Янги маълумотлар келиши билан биз оммага маълумот берамиз”, — деди Тлеуканов брифингда.
Унинг аниқлик киритишича, шу кунгача давлатга қайтарилган маблағларнинг умумий миқдори 912 миллиард тенге (2 миллиард доллар)ни ташкил этади.
Қайрат Сатибалди Қозоғистоннинг собиқ президенти Нурсултон Назарбоевнинг жияни. 2022 йил март ойида у “Казахтелеком” алоқа операторидан маблағларни ўғирлаш ва мансаб ваколатини суиистеъмол қилишда гумонланиб ҳибсга олинган эди. “Оrda.kz” нашрининг хабар беришича, Назарбоевнинг жияни “Казахтелеком” акцияларининг 24 фоиздан ортиғига эгалик қилувчи Skyline Investment Company С.А. офшор компанияси асосчиси бўлган.
Ўша йилнинг сентябрь ойида Сатибалдиули мансаб ваколатини суиистеъмол қилиш ва икки компаниянинг маблағларини ўғирлашда айбдор деб топилди. У мол-мулки мусодара қилиниб, муайян лавозимларни эгаллаш ҳуқуқидан маҳрум қилинган ҳолда олти йил муддатга ҳукм қилинди. У айбини тан олди ҳамда Марказий транспорт сервиси ва “Казахтелеком” компанияларига етказилган зарарни қоплади, бу эса жазони енгиллаштирувчи ҳолатга айланди.
2023 йил декабрь ойида Сатибалди шартли равишда озодликка чиқиш тўғрисида ариза берди, аммо суд уни рад этди.
Изоҳ (0)