Буюк Британия шифохоналари қайта ташкил этиш доирасида 150 мингдан ортиқ ходимни ишдан бўшатиши мумкин. Бу ҳақда Британия соғлиқни сақлаш ташкилотлари бирлашмаси NHS Confederation хабар бермоқда.
Маълум қилинишича, NHS England янги бош директори Жим Маки тиббий хизмат кўрсатувчи 200 дан ортиқ филиалларга 2025 йил охиригача корпоратив харажатларни ярмига қисқартириш вазифасини юклаган.
Агар 215 та филиал ушбу чора-тадбирларни амалга оширса, уларда 1,37 миллион киши ишлаётганини ҳисобга олган ҳолда, бу 41 минг 100 дан 150 минг 700 тагача иш ўрнининг йўқолишига олиб келиши мумкин, дея таъкидланади хабарда.
Бош директор, шунингдек, ходимларнинг ишдан бўшатилиши билан боғлиқ харажатларни қоплаш учун махсус жамғарма ташкил этишни ҳам топширган.
Бундан олдин Буюк Британия молия вазири Рейчел Ривс ҳукумат иқтисодий қийинчиликлар фонида 10 минг нафар давлат фуқаролик хизматчиларини қисқартиришни режалаштирганини айтган эди.
Буюк Британия “янги глобал беқарорлик даври” деб аталаётган даврда харажатларни камайтириш ва самарадорликни ошириш мақсадида давлат органларини ислоҳ қилишга интилаётгани сабабли юзлаб мустақил ҳукумат муассасаларини ёпиши мумкинлиги маълум қилинганди.
Изоҳ (0)