“Манчестер Сити” Абдуқодир Ҳусанов трансфери борасида “Ланс”га расмий таклиф юборди.
Скй Спорт журналисти Патрик Бергернинг ёзишича, Гвардиола бошчилигидаги жамоа 20 ёшли ҳимоячи учун бонуслар билан бирга 50 млн евро тўлашга тайёр.
Ўз навбатида Ўзбекистон миллий жамоаси футболчиси ҳам Англия чемпионатига ўтишга ниятида. Томонлар узоқ муддатли шартнома тузиши кутилмоқда.
Трансферлар борасида кучли инсайдер ҳисобланган Фабрицио Романо ҳам Абдуқодир Ҳусанов трансферига оз қолгани ҳақида ижтимоий тармоқлар орқали хабар қилмоқда.
Аввалроқ Ҳусанов Буюк Британия визасига ариза топширгани ҳақида маълумот берилган эди.
Ҳусанов Англиянинг “Челси” ва “Ньюкасл” клублари, Испаниянинг “Реал”, шунингдек, Франциянинг “ПСЖ” жамоаси қизиқишлари доирасида экани хабар қилинганди. Агентлар Париж вариантини ўйин амалиёти кафолати йўқлиги сабабли рад этган.
Клуб директори футболчининг январда жамоани тарк этиши мумкинлиги, аммо ҳали расмий таклифлар бўлмагани ҳақида маълум қилганди.
Ҳусанов 2023 йилда Беларуснинг “Энергетик-БГУ” клубида ўйнаган ва шу йилнинг июль ойида 100 минг евро эвазига “Ланс”га трансфер бўлганди.
Ҳусанов Франция клуби сафида 31 та ўйинда майдонга тушиб, бир марта голли узатма амалга оширди. Унинг француз клуби билан тузган шартномаси 2027 йилнинг июнига қадар амал қилади.
Transfermarkt маълумотига кўра, унинг бозор қиймати 12 миллион еврога баҳоланган.
Изоҳ (0)