Buyuk Britaniya shifoxonalari qayta tashkil etish doirasida 150 mingdan ortiq xodimni ishdan bo‘shatishi mumkin. Bu haqda Britaniya sog‘liqni saqlash tashkilotlari birlashmasi NHS Confederation xabar bermoqda.
Ma’lum qilinishicha, NHS England yangi bosh direktori Jim Maki tibbiy xizmat ko‘rsatuvchi 200 dan ortiq filiallarga 2025-yil oxirigacha korporativ xarajatlarni yarmiga qisqartirish vazifasini yuklagan.
Agar 215 ta filial ushbu chora-tadbirlarni amalga oshirsa, ularda 1,37 million kishi ishlayotganini hisobga olgan holda, bu 41 ming 100 dan 150 ming 700 tagacha ish o‘rnining yo‘qolishiga olib kelishi mumkin, deya ta’kidlanadi xabarda.
Bosh direktor, shuningdek, xodimlarning ishdan bo‘shatilishi bilan bog‘liq xarajatlarni qoplash uchun maxsus jamg‘arma tashkil etishni ham topshirgan.
Bundan oldin Buyuk Britaniya moliya vaziri Reychel Rivs hukumat iqtisodiy qiyinchiliklar fonida 10 ming nafar davlat fuqarolik xizmatchilarini qisqartirishni rejalashtirganini aytgan edi.
Buyuk Britaniya “yangi global beqarorlik davri” deb atalayotgan davrda xarajatlarni kamaytirish va samaradorlikni oshirish maqsadida davlat organlarini isloh qilishga intilayotgani sababli yuzlab mustaqil hukumat muassasalarini yopishi mumkinligi ma’lum qilingandi.
Izoh (0)