Zagato кузов ательеси ҳамда Aston Martin ўртасидаги ҳамкорлиги узоқ йиллардан бери давом этиб келади. Мода соҳасида италян услуби тез-тез британларники билан қарши қўйилади. Автомобиль ва дизайн соҳасида ҳам худди шундай: Англия ва Италия миллий мактаблари бир-бирига умуман ўхшамайди. Бироқ қарама-қаршилик бир-бирига тортишади. Биринчи Aston Martin Zagato модели Ferrari билан беллашиш учун яратилган, бироқ трассадаги курашлар миллиардерларнинг ҳамёни жангига айланиб кетган, деб хабар беради Motor.
Aston Martin DB4 GT Zagato, 1960 йил
DB4 GТ Zagato — Aston Martin ва Zagato ўртасидаги олтмиш йиллик ҳамкорликнинг бошланиши ҳисобланади. У ғалаба иштиёқи сабаб пайдо бўлган: Гудвуддаги Tourist Trophy пойгаларида «оддий» DB4 GТ Ferrari 250 GT’ни ҳеч қанақасига қувиб ўта олмаган. «Британиялик» жуда оғир ва қуввати кам бўлган. Миланнинг Zagato ательеси эса пойга спорткарлари модификацияси билан танилган.
DB4 GTZ дизайни учун ёш Эрколе Спада жавоб берган, унинг ишлари орасидан Alfa Romeo 155 ва BMW 5-Series E34 ҳам ўрин олган. Унинг меҳнати натижасида алюминий кузов бамперларидан айрилиб, анча суйрилашган. Диета сабаб купе 183 килограмм «ташлаган», қуввати эса 240 дан 314 от кучига етган. Гўзаллик дунёни қутқариши мумкин, бироқ бу Aston Martin’га ёрдам бермаган: Ferrari барибир қайта ишланган DB4’дан муваффақиятли чиққан. Натижада яратилган 19 машина ғалаба нашидасини сура олмай, турли коллекцияларга тарқаб кетган.
Aston Martin V8 Vantage Zagato, 1985 йил
Аston ва Zagato’нинг навбатида ютуғини чорак аср кутишга тўғри келган. 1984 йилда Женевада Ferrari 288 GТО ва Porsche 959 намойиш этилган. Aston Martin раҳбари эса ўйга толган: «Нега италян ва немислар чекланган миқдорда кучли машиналарни ярата олади, биз эса йўқ?». Бунда Zagato’нинг ёрдами керак бўлади. Яратилажак машинанинг илк эскизлари 1985 йилнинг март ойида тақдим этилган. Биргина тасвирнинг ўзи шу йилнинг августига бориб 52 купени сотилишига кифоя қилган. Автомобиль учун 156 600 доллар сўрашган (ҳозирги кундаги курс бўйича бу қарийб 375 минг долларни ташкил этади).
V8 Vantage Zagato номини олган машина V8 Vantage’нинг қисқартирилган базаси асосида яратилган бўлиб, бу унинг оғирлигининг камайишига олиб келган. 5,3 литрли V8 двигатели 437 от кучига эга бўлган. Бу каби қувват билан 1650 килограммли машина 100 км/соат тезликка 4,6 сонияда эриша олган, максимал тезлиги эса 299 км/соат тезликка етган.
Aston Martin DB7 Zagato, 2002 йил
2002 йилда DB7 моделига саккиз йил тўлган, DB9 яратилишига эса яна икки йил бор. Женева автосалонида британияликлар Aston Martin ва Zagato яна ҳамкорликка қайтишини маълум қилган. DB7 Zagato кузови «кенгайтириш ва қисқартириш» схемаси асосида яратилган, бироқ 1850 килограммли купе суперкарлар билан пойгалашиш ниятида бўлмаган.
Aston Martin Vanquish Roadster Zagato, 2004 йил
DB7 Zagato’нинг премьерасидан икки йил ўтиб, 2004 йилда энг ноёб инглиз-италян спорткарларидан бири яратилган. Унинг устида Aston Martin ва Jaguar’нинг собиқ дизайнери Иэн Келлум ҳамда Zagato’нинг кўплаб машиналарини яратган Норихико Харада иш олиб борган. Автомобиль ташқи кўриниши билан оддий V12 Vanquish’дан катта фарқ қилмаган, фақатгина бир муҳим деталь — ушбу авлод Vanquish’ида «родстер» кузови бўлмаган.
Машина ўриндиғининг орқасида ойнали қубба бўлган, уни хоҳишга қараб енгилгина кўтариш мумкин эди.
Aston Martin V12 Zagato, 2012 йил
Аston Martin ва Zagato ҳамкорлигига ярим аср тўлиши муносабати билан кенг қулоч ёйишга қарор қилади. Бунинг учун улар V12 Vantage GT3 пойга машинаси олиб, унинг кузовини ечиб ташлаб, иккита V12 Zagato Race купесини яратади — улардан бирига «Зиг», иккинчисига, «Заг» деб ном қўйилган. 530 от кучига эга V12 двигателли автомобиль бутун дунё бўйлаб пойгаларда иштирок эта бошлайди: икки йил давомида автомобиль Нюрбургринг, Гудвуд ва Ле-Ман трассаларида ҳаракатланган. Машина мижозларга шу қадар ёқиб тушадики, 2012 йилда V12 Zagato серияли ишлаб чиқарила бошлайди.
Aston Martin DBS Coupe Zagato Centennial 2013 йил
Мазкур модель Zagato тарихидаги энг ноодатий машиналардан бири ҳисобланади. Барчаси италияликлар Aston Martin’нинг юз йиллигига совға тайёрлашни ўйлаганидан сўнг бошланади. Бунинг учун уларга учта машина керак бўлади: BD9, Virage ва DBS нусхаларидан. Британия маркасининг раҳбаридан рухсат олингач, италияликлар Zagato концептни оммага тақдим этмагунича, Aston Martin’даги ҳеч ким уни кўрмайди, дея шарт қўяди. Натижада «Юз йиллик трилогияси» номли лойиҳа бирма-бир тақдим этилади — 2013 йилда купе ва родстер, шутинг-брейк эса 2014 йилда.
Aston Martin Vanquish Zagato, 2016 йил
Aston Martin Vanquish Zagato линейкаси «Юз йиллик трилогия» рекордини янгилаган: унинг таркибидан тўртта автомобиль ўрин олган. Барчаси 2016 йилда тақдим этилган купедан (99 нусха) сўнг бошланган, ундан кейин таркибга кабриолет (99 нусха), шутинг-брейк (99 нусха) ва спидстер (28 нусха) келиб қўшилган. Жами 325 та машина Aston Martin Vanquish S базасида яратилган ва уларга 600 от кучига эга В12 ўрнатилган.
Aston Martin DBZ Centenary Collection, 2019 йил
DBZ Centenary Collection Zagato’нинг 100 йиллигига бағишлаб чиқарилган. Унинг таркибидан иккита машина ўрин олган: замонавий DBS GТ Zagato ва DB4 GТ Zagato Continuation — оригиналига максимал даражада яқинлаштирилган модель.
DBS GТ Zagato DBS Superleggera базаси яратилган, бироқ бутунлай фарқ қилади. Том қисми углепластикдан тайёрланган: орқага фақат камера орқали қараш мумкин. 770 от кучига эга V12 битурбомотор ўрнатилган бўлиб, 6 миллион фунт стерлингдан сотувга чиққан.
Aston Martin Vantage V12 Zagato Heritage Twins by R-Reforged, 2020 йил
Энг сўнгги жамланма жорий йилнинг апрель ойида тақдим этилди. Уни ишлаб чиқаришда иккита мақсад кўзланган: Zagato асос солинганига 100 йил, Aston Martin билан ҳамкорликка эса 60 йил тўлиши муносабати билан. R-Reforged’ни яратишга компаниянинг AF Racing AG бўлинмаси жалб этилади.
Vantage V12 Zagato Heritage номи остидаги жамланмадан купе ва спидстер ўрин олади. Жами 19 жуфт нусхада ишлаб чиқариладиган моделга 600 от кучига эга 5,9 литрли V12 Vantage ўрнатилади.
Изоҳ (0)