Сирдарё вилояти Гулистон шаҳри учун 12 дона янги автобус олиб келинди. Бу ҳақда Транспорт вазирлиги хабар берди.
Қайд этилишича, давлат раҳбарининг 2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги қарорида белгиланган вазифалар ижроси доирасида Гулистон шаҳрида аҳолига сифатли жамоат транспорти хизмати кўрсатишни йўлга қўйиш мақсадида замонавий автобуслари олиб келиниши давом этмоқда.
2024 йилда Сирдарё вилоятига ХХР ишлаб чиқарилган замонавий турдаги 8 дона Yutong русумли автобуслар олиб келиниб, Гулистон шаҳар йўналишларига жойлаштирилган эди. Жамоат транспорти паркини янгилаш борасидаги ишлар доирасида “Транс Имкон Сервис” МЧЖ томонидан ХХР ишлаб чиқарилган 12 дона Зҳонг Тонг русумли шаҳар типидаги автобуслар олиб келинди.
Олиб келинган янги автобуслар Гулистон шаҳридаги йўналишларда фаолият кўрсатаётган Isuzu русумли автобуслар ўрнига жойлаштирилиб, шаҳар аҳолиси ва ташриф буюрувчи меҳмонларга транспорт хизматлари кўрсатилиши режалаштирилган.
Шунингдек, “Гулистон-Терминал” МЧЖ томонидан 8 дона янги Зҳонг Тонг русумли автобуслар харид қилиш бўйича келишув шартномалари тузилди. Бошқа маҳаллий тадбиркорлар томонидан ҳам янги замонавий автобуслар харид қилиш бўйича зарурий ишлар амалга оширилмоқда.
Умумий ҳисобда Гулистон шаҳридаги жамоат транспортлари учун жами 65 дона янги автобуслар харид қилиши режалаштирилган.
Бундан аввал Ангренга 15 та Yutong автобуси олиб келинганди. Зоир Мирзаев 2024 йил октябрида ўтказган ҳокимлик соатида Тошкент вилоятида транспорт соҳасидаги хизматларни яхшилаш учун 1000 та янги автобус харид қилиш бўйича топшириқ берганди.
Транспорт вазирлиги матбуот хизматининг билдиришича, ҳудудларда аҳолига кўрсатилаётган транспорт хизматлари сифатини яхшилаш мақсадида замонавий автобусларни олиб келиш ишлари давом этмоқда. Тошкент шаҳрига яна 1000 та Yutong автобусини олиб келиш имкониятлари ўрганилмоқда. Андижон вилоятига Хитойдан 100 та электробус харид қилиниши режалаштирилган.
Изоҳ (0)