Сурхондарё вилояти Бойсун туманида 8 ёшли қиз юк машинаси уриб юбориши оқибатида вафот этди. Бу ҳақда вилоят ЙҲХБ хабар берди.
Маълум қилинишича, ҳолат 7 март куни вилоятнинг Бойсун тумани “Дарбанд” маҳалласи ҳудудида содир бўлган. 2-синф ўқувчиси бўлган 8 ёшли қиз мактабдан чиқиб, автомобиль йўлини кесиб ўтаётган вақтда 1992-йилда туғилган ҳайдовчи ГАЗ-53 русумли юк автомашинаси билан келиб уни уриб юборган.
Ушбу ЙТҲ натижасида вояга етмаган 8 ёшли қиз олган оғир тан жароҳатлари билан туман шифохонасида вафот этган.
Йўлларда болалар ўлими
2024 йил ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сенат берган маълумотга кўра, 2024 йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган. 2023 йилда болалар билан боғлиқ 1 794 та ЙТҲ юз бериб, уларда 1 568 нафар бола жароҳатланган, 263 нафари вафот этган.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Шу каби ҳолатлар:
- Андижонда Damas йўлдан югуриб ўтаётган 10 ёшли болани уриб юборди
- Сурхондарёда Nexia “пешеход”дан ўтаётган 8 ёшли болани уриб юборди
- Самарқандда машинада дарахтга урилган 11-синф ўқувчиси вафот этди
- Тошкентда содир бўлган ЙТҲ оқибатида 10 ёшли ўқувчи жароҳатланди
- Қорақалпоғистонда Cobalt ҳайдовчиси мактаб ўқувчисини уриб, қочиб кетди (видео)
Изоҳ (0)