Замонавий дунёни IT’сиз тасаввур қилиш мушкул. Дастурчилар, киберхавфсизлик мутахассислари ва соҳанинг бошқа вакиллари рақамли оламнинг пойдеворини яратади. “Дарё”нинг навбатдаги меҳмони 7 йиллик тажрибага эга график дизайнер Мадина Мавлонова. У бугунги кунда “Қизлар академияси” лойиҳасида график дизайн йўналишида ментор бўлиб ишлайди, Logo&Branding курси муаллифи, IT Ladies Uzbekistan журнали юзи ҳамда Yulduz Tech Awards тақдирланувчиси.
“Ёш устозимнинг компьютерни яхши тушуниши менга мотивация бўлган”
— Биз оилада тўрт кишимиз — дадам, ойим, мен ва укам. Болалигимдан бундай соҳа борлигини ҳам билмасдим аслида. Қизлар қизиқадиган шифокорлик, таржимонлик ва актрисалик касбларига мен ҳам қизиқардим.
Мактабда информатика устозимиз ТАТУни битириб келган ёш қиз бўлишига қарамай, компьютерни жуда яхши тушунарди. Қиз бола бўла туриб, техникани яхши билиши менга мотивация бўлган ва мен ҳам унга ўхшашни хоҳлаганман. Мактабни тамомлагач, 2017 йилда техника касб-ҳунар коллежида компьютер йўналишига ўқишга кирдим. Бу ерга киришимнинг яна бир сабаби уйимизга яқинлигида ҳам эди. Чунки онам мени узоқроқ жойга бир ўзимни юборишга ўрганмаганди. У мени тиббиёт йўналишида кетишимни хоҳлаган, сабаби кўп қариндошларим шифокор эди. Лекин оиламдан жуда қаттиқ босим бўлмаган, дейди Мадина.
“Илк компьютеримни ўзим сотиб олганман”
— Коллежда 2-курсда амалиёт ўташ учун фотостудияга борганман. Компьютерни яхшироқ ўрганиш учун менга фақат шу фотостудия тўғри келган. Амалиётни яхши ўзлаштирганим учун дарсдан сўнг шу ерда ишлашингиз мумкин, пулини тўлаймиз деган таклиф беришган. У ердан кунига 25 минг сўм топардим. Шундан беш минг сўми кунлик харажатим, яъни автобус ва тушлик учун етарди. Беш кунлик иш ҳақимни ҳафта охирида 100 минг сўм қилиб онамга берардим. Маошимга ўзим учун асосий иш қуроли — биринчи компьютеримни сотиб олганман. IT’нинг график дизайн йўналишига илк қадамимни шу ерда қўйганман.
“Ишимни рад этмоқчи бўлишган, аммо тўхтамаганман”
— Илк ишим бир компанияга логотип ясаб бериш бўлган. Тахминан 100 га яқин вариант қилганман, аммо мижоз рад этаверган. Майли қўяверинг, қийналиб ҳам кетдингиз, деган. Аммо мен бир ишни бошладимми, охиригача етказишга ўрганганман. Шу тариқа унга ўзи истаганидек маҳсулотни чиқариб берганман ва ишимни 100 минг сўмга сотганман. 2019 йиллардаги воқеа бу. Тўғри, камроқ, аммо инсон ўзи ишлаб чиқарган маҳсулотни кўчада кўриб қолиши жуда фахрланарли. Пул эса қўшимча ёқимли бонус бўлган.
Ўша вақтларда ҳам иш топиш ва ишчи кераклигини эълон қиладиган каналлар бўларди. Коллежни тамомлаб, шу каналларда қила оладиган ишларим ҳақида эълон берганман. Бир компаниядан бизда ишлашингиз мумкин деб алоқага чиқишган. Офисда эркаклар кўп эди, қизлардан фақат бир ўзим ишлардим. Битта бўлса ҳам қиз бола ишга олайлик, ёнимда мен билан ишласа бўлди, деб сўрайверардим. Бироқ бу мақсадимдан қайтишга сабаб бўлолмаган, соҳанинг ўзи менга ёққан. Бу касб аслида қизлар учун кўпроқ мос-ку, деб кўп ўйлардим. Чунки график дизайн соҳаси эстетика, дид, гўзаллик, тартиблаш билан боғлиқ.
“IT аслида қизларнинг касби!”
— IT’чилар нима қилади? Бугунги кунда улар асосан web сайтлар яратади. Аммо сайтнинг макетини, дизайнини ким қилиб беради? График дизайнерлар, албатта. Логотипни ҳам, прототипни ҳам дизайнер ясайди. Шу сабабли ишимиз IT билан боғлиқ. Шахсан мен ишимни IT соҳаси деб ҳисоблайман, сабаби сунъий интеллект ва бошқа қидирув тизимларидан кенг фойдаланамиз.
Бугунги кунда кўплаб маҳаллий ва хорижий компаниялар билан ҳамкорликда ишлайман. Бренд дизайн бўйича онлайн курсим бор, кўплаб ўқувчиларнинг устозиман. Шогирдларимнинг баъзилари ҳатто мендан ҳам ўтади.
IT соҳаси эркак кишидан ҳам кўпроқ қизларга мос деб айта оламан. Ота-оналар одатда фарзандининг узоқроқ ишхонага боришидан хавотир олиши мумкин. Бу соҳа айнан ота-онанинг хавотирини камайтиришга ёрдам беради. Нега? Компьютер билан ишласа, IT’да уйдан чиқмай ҳам ишласа, катта даромадга чиқса бўлади. Фақат ундан аввал ўқув марказ ва курсларга боришга шароит яратиб беришса, кифоя.
“Меҳнатим орқали дадамга Cobalt автомобилини совға қилганман”
— Ёшлигимдан ота-онамга мени ўқитишгани эвазига уларни рози қилиш, миннатдорчилик билдириш мақсадида уй ёки автомобиль совға қилиш фикри бўларди. Ўзим ишлаб топган пулларим орқали дадамга Cobalt автомобилини совға қилмоқчи бўлганман. Пулимни банкдан доллар қилиб келганимда ҳар сафар қувонардим. Баъзида 50 доллар, баъзида 100 доллар қўшардим. Вақти келса, 300-400 долларлаб ҳам йиғиш қутисига солиб юборардим. Машина автосалондан чиқадиган куни ҳамма оила аъзоларим билан борганмиз, дадам жуда хурсанд бўлган. Онам дадамдан кўпроқ қувонган. Машина рақами турадиган жойида “Дадажонимга” деб ёздириб, машинани қизил ленталар билан безатганман. Йўлда бошқа ҳайдовчилар ҳам сигнал чалиб, табриклашган. Севган соҳам орқали орзуларимдан бирини амалга оширганман.
Видеони тўлиқ ҳолда қуйидаги ҳавола орқали томоша қилишингиз мумкин.
Изоҳ (0)