Давлат хавфсизлик хизмати Наманган вилояти бошқармаси ва вилоят ички ишлар органлари томонидан ўтказилган тезкор тадбирларда “Ислом давлати” террористик ташкилоти ғоялари таъсирига тушган 21 нафар шахс қўлга олинди. Бу ҳақда ДХХ матбуот хизмати хабар берди.
Жамоатнинг етакчиси, Поп тумани “Янгиобод” маҳалласида истиқомат қилувчи фуқаро ижтимоий тармоқларда ноқонуний каналлар яратиб, унга “Ислом давлати” террористик ташкилоти ғояларини тарғиб қилувчи материалларни тарқатиб келган. Аниқланишича, ушбу фуқаро ижтимоий тармоқлардан фойдаланиш давомида айни пайтда Жанубий Кореяда мавсумий ишлаб келаётган Фарғона вилояти Учкўприк туманида рўйхатда турувчи шахс билан танишиб, унинг виртуал таъсирида террористик ташкилотлар фаолиятига жалб қилинган.
Ушбу шахслар ота-оналарнинг розилигисиз шаръий никоҳдан ўтган ҳолда, келгусида жанговар ҳаракатлар амалга оширилаётган ўчоқли ҳудудларга ҳижрат қилиб кетишни режалаштирган. У ўзининг ҳаракатларига узоқ қариндоши ва маҳалладошини ҳам жалб қилган. Ушбу фуқаролар ижтимоий тармоқларда яширин каналлар ташкил қилиб, унга ўзининг яқин қариндошлари, маҳалладошлари ҳамда экстремизмга мойил бўлган шахсларни аъзо қилиб, уларга террористик ташкилотларининг амалга ошираётган қўпорувчилик ҳаракатлари, қатл саҳналари, қонли жанглар, амалдаги давлат тузумини куч билан ағдариб ташлашга қаратилган ғояларни сингдириб келган.
Мен ижтимоий тармоқларда “Ислом давлати” террорчиларининг таъсирига тушиб қолиб, ўзимнинг Telegram’им орқали каналлар очиб, террорчиларнинг қотилликлари акс этган видеолар, даъватлари акс этган видеолар ва дарсликларини тарқатганман. Террорчиларнинг материаллари билан танишишимдан олдин Мисрга ҳижрат қилиб, у ерда илм олиб, сўнг “Ислом давлати” террорчилари билан биргаликда жиҳод қилишни мақсад қилгандим.
Мен бу ишимдан афсусдаман. Агар менга имкон берилса, келгусида бу ишлардан узоқ юришни, тармоқлардан тўғри мақсадга фойдаланишни, ота-онамга, халқимга яхши хизмат қилишни ваъда бераман ва мен каби ёшларни ижтимоий тармоқлардан тўғри фойдаланишларини сўраб қоламан, деган қўлга олинган қизлардан бири.
Ушбу фуқаролар бир неча маротаба огоҳлантирилган, бироқ улар ўзларига тегишли хулоса чиқармасдан, ўз фаолиятини махфий тарзда давом эттириб келган. Шунга қарамай уларнинг яширин фаолияти узоққа бормади. Тезкор тадбир давомида жамоат аъзоларидан диний адабиётлар, ахборот ташувчилар ва бошқа ашёвий далиллар тегишли тартибда холислар иштирокида процессуал тартибда расмийлаштириб олинди.
Тадбир натижасида жамоатнинг наманганлик тўрт нафар етакчисига нисбатан Жиноят кодексининг 244-1 (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) ва 244-2-моддалари (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилиб, уларнинг икки нафарига қамоқ эҳтиёт чораси қўлланилган. Қолган 17 нафар аъзоларга нисбатан тергов ҳаракатлари давом эттирилмоқда.
Июль ойининг охирларида Андижон вилоятида 28 ёшли халқаро террористик ташкилот тарафдори 8 йил 6 ойга озодликдан маҳрум қилинганди.
Изоҳ (0)