Президентнинг тегишли қарорига кўра, Алишер Бобоев соғлиқни сақлаш вазирининг биринчи ўринбосари этиб тайинланди. Бу ҳақда вазирлик матбуот хизмати хабар берди.
У тайинловга қадар 2023 йилнинг октябридан буён Қашқадарё вилояти соғлиқни сақлаш бошқармаси бошлиғи сифатида фаолият юритиб келаётган эди.
2024 йилнинг январида соғлиқни сақлаш вазирининг биринчи ўринбосари Алишер Шодмонов узоқ муддатли даволаниш учун меҳнат таътилига чиқиши муносабати билан унинг вазифасини вақтинчалик бажариш Президент администрацияси Ижтимоий ривожланиш департаменти соғлиқни сақлашни ривожлантириш шўбаси мудири Даврон Султанов зиммасига юклатилганди.
Алишер Бобоев 1996 йилда Тошкент давлат тиббиёт институтини тамомлаб, ушбу олий ўқув юртининг клиник ординатура йўналишида таҳсил олган. Меҳнат фаолиятини 1998 йилда Тошкент давлат тиббиёт институтида катта лаборант сифатида бошлаган.
Турли йилларда Тошкент фармацевтика институти тиббий биологик фанлар кафедраси катта лаборанти, Тошкент шаҳар Олмазор тумани кўп тармоқли марказий поликлиникаси, 1-сонли Республика клиник шифохонаси маслаҳат-диагностика поликлиникаси ҳамда Республика клиник шифохонаси урология бўлими сингари қатор муассасаларда шифокор-уролог, Соғлиқни сақлаш вазирлиги котибиятида бош мутахассис каби лавозимларда ишлаган. II даражали “Саломатлик” ордени билан тақдирланган.
Изоҳ (0)