Тошкент халқаро аэропортида 29 март куни Москвадан учиб келган самолёт қабул қилиб олинди, деб хабар берди Ижтимоий ҳимоя миллий агентлиги матбуот хизмати.
Маълум қилинишича, самолётда ИИВ ва ССВ ходимлари ҳамроҳлигида Россияда ота-она қарамоғисиз қолган 11 нафар вояга етмаган ўзбекистонлик бола ватанга қайтарилди.
Жараён давомида Ўзбекистоннинг Россиядаги элчихонаси болаларни ватанга қайтариш учун зарур бўлган ҳужжатларни тайёрлаш ва расмийлаштириш ишларини ўз вақтида амалга оширди.
Болалар вақтинча Тошкент шаҳар ИИББ қошидаги Вояга етмаганларга ижтимоий-ҳуқуқий ёрдам кўрсатиш марказига жойлаштирилган. Эндиликда болаларнинг 4 нафари “Инсон” ижтимоий хизматлар марказлари томонидан олдиндан тайёрланган ўз оилаларига, 7 нафари эса васийлик ва ҳомийлик тайинланган ҳолда яқин қариндошларига топширилади.
Вояга етмаганларга ижтимоий ёрдам уларнинг келгусидаги яшаш жойларида ҳам давом эттирилади.
2024 йил август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди.
Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
2025 йилнинг февраль ойи охирида Россияда икки боласи билан қийин вазиятда қолган аёл Ўзбекистонга қайтарилганди.
14 март куни Ўзбекистон ИИВ, ССВ ходимларидан иборат ишчи гуруҳ хорижда ота-онаси қарамоғидан маҳрум бўлган фуқароларнинг болаларини ватанга қайтариш мақсадида хизмат сафарига Россияга жўнаб кетганди.
Изоҳ (0)