Сирдарё вилоятининг Гулистон шаҳридан Тошкент вилоятининг Бўстонлиқ туманидаги Чиноркент бекатигача 28 мартдан поезд қатнови йўлга қўйилди. Бу ҳақда Сирдарё вилояти ҳокимлиги хабар берди.
Қайд этилишича, ушбу электропоезд Гулистондан Чиноркентгача бўлган масофани 3,5 соатда босиб ўтади.
Йўл ҳақи:
- Гулистондан Тошкентгача — 20 минг сўм,
- Чиноркентгача катталар учун — 40 минг сўм, болалар учун — 23 минг сўм.
Тўловни ATTO транспорт картаси ёрдамида тўлаш ёки чипталарни темирйўл чиптахоналаридан ҳам харид қилиш мумкин.
Барча шарт-шароит, иситиш ва совитиш тизимига эга бўлган электропоезд вагонлари кенг, шинам ва хавфсизлиги билан ажралиб туради. 6 та вагондан иборат бўлган мазкур электропоезднинг умумий сиғими 586 йўловчига мўлжалланган, дейди “Ўзбекистон темир йўллари” АЖ шаҳар атрофида йўловчи ташиш МЧЖ маркетинг ва сервис хизмат кўрсатиш бўйича директори ўринбосари Дилмурод Убайдуллаев.
Электропоезд ҳаракатланиш жадвалига асосан ҳар куни қатнайди. Гулистондан тонгги соат 6:11 да йўлга чиқса, Чиноркентдан Гулистонга қараб 15:43 да жўнаб, 19:00 да Гулистонга етиб келади.
“Ўзтемирйўлйўловчи” АЖ матбуот хизмати қатнов жадвали ҳақида барафсил маълумот берди. Унга кўра, 7211-сонли Гулистон—Тошкент шаҳарлараро тезюрар поезди қатнови ҳафтанинг ҳар куни йўлга қўйилади 7212- сонли Тошкент—Гулистон, 7207/7208,7209/7210-сонли Тошкент—Чиноркент Тошкент шаҳарлараро тезюрар поезди қатнови ҳафтанинг сешанба кунидан ташқари ҳар куни йўлга қўйилади ва қуйидаги жадвал асосида ҳаракатланади:
- 7211-сонли Гулистон—Тошкент йўналиши: Гулистон 06:11 — Тошкент 07:58;
- 7207-сонли Тошкент—Чиноркент йўналиши: Тошкент 08:15 — Чиноркент 10:15;
- 7208-сонли Чиноркент—Тошкент йўналиши: Чиноркент 10:55 — Тошкент 12:28;
- 7209-сонли Тошкент—Чиноркентйўналиши: Тошкент 13:20 — Чиноркент 14:53;
- 7210-сонли Чиноркент—Тошкент йўналиши: Чиноркент 15:43 — Тошкент 17:16;
- 7212-сонли Тошкент—Гулистон йўналиши: Тошкент 17:31 — Гулистон 19:00.
Шавкат Мирзиёев 2024 йилнинг март ойида Тошкент йўловчи вагонларни қуриш ва таъмирлаш заводини бориб кўрганида поездлар тармоғини кенгайтириб, аҳолини кўп туманларга олиб бориш бўйича топшириқ берганди. Тошкент вилоятининг Паркент туманида Байтқўрғон—Паркент электрлаштирилган темирйўл қурилиши ҳам бошланган.
Изоҳ (0)