Муҳаммад Расул 1996 йилнинг 20 март куни Фарғона вилояти Бувайда тумани Янгиқўрғон қишлоғида туғилган. 2011—2014 йилларда Жаҳон иқтисодиёти ва дипломатия университети қошидаги академик лицейда таълим олган. Кейинчалик, 2014—2018 йилларда Ўзбекистон давлат жаҳон тиллари университетининг Хорижий тил ва адабиёти (инглиз тили) йўналишида бакалавр даражасини қўлга киритган.
2019—2020 йилларда Латвия пойтахти Ригада жойлашган Ekonomikas un Kulturas Augstskola университетида ўқишни давом эттириб, 2020—2022 йилларда Прага Монтессори институтида таълим олган, бу эса келгусидаги фаолиятига катта замин яратганини таъкидлайди.
Муҳаммад Расул 2017—2018 йилларда Тошкент вилоятининг Юқори Чирчиқ туманидаги 10-мактабда инглиз тили ўқитувчиси сифатида ишлаган. 2018—2019 йилларда эса ҚДПИ қошидаги академик лицейда инглиз тили ўқитувчиси лавозимида фаолият юритган. 2019 йилда Ригеле Халқаро Монтессори болалар марказига қўшилган. Дастлаб инглиз тили ўқитувчиси сифатида иш бошлаб, 2020 йилда 3–6-синф ассисстенти бўлган ва ниҳоят, 2021 йилдан 2024 йил апрелгача 3–6-синфларнинг етакчи гид ўқитувчиси лавозимида ишлаган.
2024 йил май ойида Ўзбекистонга қайтиб Дилдора Калонхўжаева билан биргаликда Тошкент халқаро Монтессори мактабига асос солган. Шу билан бирга, 2024 йил сентябрь ойида “Бамбини” платформасини ишга туширган.
Аслида Латвияга магистратура босқичида Бизнес администрациясини ўқишга борган эдим. Иш излаб юрган вақтларим, 2019 йилда Ригеле Халқаро Монтессори болалар марказига қўшилдим. Дастлаб инглиз тили ўқитувчиси сифатида иш бошлаб, 2020 йилда 3–6-синф ассисстенти бўлдим. Мен ушбу таълим тури таълим тизимимизни ривожлантириш учун калит эканлигини тушуниб етдим. Шу сабабли ҳам магистратурамни ташлаб Прага Монтессори институтига ўқишга кирдим.
Мен ҳар доим ватанга қайтишимни билардим. Йўлга отланишимдан аввал бувам “Ўғлим, четга кетаётган бўлсанг, у ерда билим олиб, ўқиб, Ўзбекистонга янгилик олиб кел. Ҳатто велосипеднинг янги бир қисмини ўргансанг ҳам, шуни олиб кел”, деганлар. Бу ҳар доим қулоқларим остида турган. Ва ниҳоят 2024 йилда ватанга қайтишим олдидан Латвия, Эстония, Словакия, Чехия, Бельгия ва Дубайдаги мактаблардан таклифлар кела бошлади. Аммо мен Ўзбекистонга европаликлар ёки дунёнинг бошқа ривожланган мамлакатларида мавжуд таълим турини кенг ёйиш, болаларга ўзим сифатли деб билган билимларни бериш мақсадида қайтдим.
Монтессори ҳақида
Монтессори тизими билан тасодифан танишиб қолганман. Устозларнинг болаларга меҳри, ҳурмати, муносабати, мулоқоти, уларни тушуниши менинг ҳаётий миссиям айнан шунда, деган фикрга келишимга туртки бўлди. Ҳаётнинг қизиқлиги шундаки, мен ҳар доим яқинларимга ўқитувчи сифатида ишламаслигим ҳақида гапирардим. Бу касб эгаларининг фидойилиги, ўрни келса, ҳатто оиласидан ҳам кўпроқ меҳрни айнан болаларга бериши кераклиги озроқ қўрқув соларди.
Монтессори тизими болага ҳурмат, руҳий ва жисмоний бола учун тайёрланган муҳит, чегаралар ичида эркинликлар, интеллектуал, руҳий ва жисмоний тайёргарликдан ўтган намуна бўла оладиган Монтессори ўқитувчиси ва ота-онаси, боланинг заруратларини таъминлаш каби тамойилларга асосланади. Ҳар бир бола учун индивидуал дастур ишлаб чиқилади, болалар мия ривожланиш босқичларига асосланган гуруҳлар, масалан, 1,5 ёшдан 3 ёшгача синф, 3 ёшдан 6 ёшгача синф, 6 ёшдан 12 ёшгача синф 12 ёшдан 18 ёшгача синфлар ташкил этилади. Бола ўзи доимий танлов қилади, мустақилликка қадам қўяди. Масъулиятли бўлади, бу эса унга ишонч беради. Бу ўз навбатида болага қувонч ва доимий янги материалларни ўзлаштиришга имкон яратади. Монтессори методи яхлит бўлиб, у орқали боланинг жисмоний, ақлий, руҳий ва ижтимоий ривожланишини қўллаб-қувватлаш мумкин. Шунинг учун бошқа қўшимча методларга эҳтиёж йўқ. Материалларимизнинг ҳаммаси Монтессори материаллари.
Болаларнинг янги материални кўрсатганимда кашфиёт ҳиссини туюши, уларнинг кўзидаги қизиқиш, ҳайратни кўришдан-да завқлироқ жараён йўқ. Яқинда бир болакайга янги материални кўрсатдим, у шу даражада қизиқдики, куни билан 3 соат ҳеч қаерга чалғимасдан ишлади. Бу ишимнинг биринчи йили эди. Мен буни кўриб тўғри йўлдалигимни тушунганман. Болалар билан ишлашда энг муҳими раҳмдил, меҳрибон бўлиш ва доим ўз устида ишлашга тайёрлик.
Ҳозирда Тошкент халқаро Монтессори мактабида асосий стратегик қарорларни қабул қиламан, етакчи гид сифатида синфда болалар билан ишлайман. Бундан ташқари, ота-оналар билан доимий мулоқот, ташкилотчилик вазифалари, болалар қабули ва уларнинг мослашиш жараёни каби масъулиятлар менинг бўйнимда. Айтиш керакки, ота-оналарнинг аксарияти Ўзбекистонда Монтессори тизими ҳақида тасаввурга эга эмас ва бу табиий ҳол. Мақсадим ҳар бир ўзбек ота-онаси Монтессори ҳақида эшитиши, уларга тизим фалсафасини етказиш, уйда фарзандига инсон сифатида муомала қилиши ва ҳурмат билан муносабатда бўлишига эришишдан иборат. Меҳр ва муҳаббатга асосланган муҳитни яратиш, хавфсиз ва соғлом муносабатларни шакллантириш, болаларни урмасдан, уларга бақирмасдан, уларни бошқаларга солиштирмасдан, уларни камситмай эмоционал ҳолатига эътибор бериб тарбиялаш орқали ёрдам бериш мумкин.
2024 йил декабрь ойида қаҳрамонимиз Қозоғистон, Қирғизистон ва Тожикистондаги Монтессори мактаблари билан ҳамкорлик меморандумини имзолаб, Олмаота шаҳрида Марказий Осиё Монтессори институтига асос солишда иштирок этган.
Изоҳ (0)