Ўтган икки ойда хорижда қаровсиз қолган 34 нафар бола Ўзбекистонга қайтарилди, деб хабар бермоқда Ижтимоий ҳимоя миллий агентлиги.
Маълум қилинишича, октябрь ойининг дастлабки кунларида Ички ишлар, Ташқи ишлар ва Соғлиқни сақлаш вазирликлари билан ҳамкорликда хорижда ота-она қарамоғидан маҳрум бўлган яна 4 нафар бола Ўзбекистонга қайтарилди. Уларнинг 3 нафари Туркиядан, 1 нафари Россиядан олиб келинди.
Бунда Ижтимоий ҳимоя миллий агентлиги томонидан болаларни жойлаштириш ва уларни оилаларига ёки яқин қариндошларига қайтариш бўйича тезкор чоралар кўрилди. Хусусан, 2 нафари ота-онасига, 1 нафари холасининг васийлигига топшириш бўйича расмийлаштирилди. Бир нафар бола бўйича вазият баҳоланмоқда ва онаси Россиядан қайтгунигача вақтинчалик васийликни расмийлаштириш учун яқин қариндошлари аниқланмоқда.
Маълумот учун, август сентябрь ойларида хорижда ота-она қарамоғидан маҳрум бўлган 34 нафар бола Ўзбекистон Республикасига қайтарилди. Ўтган давр мобайнида жами 89 нафар Ўзбекистоннинг вояга етмаган фуқаролари қайтарилди.
Ижтимоий ҳимоя миллий агентлиги томонидан уларга ўзларининг яшаш манзилига яқин “Инсон” ижтимоий хизматлар марказлари томонидан бир қатор ижтимоий хизматлар, жумладан, болаларнинг ўзлари ва уларнинг оила аъзоларига психологик ва ҳуқуқий ёрдам кўрсатилмоқда.
Бундан аввал Россияда қаровсиз қолган 8 ойлик гўдак Ўзбекистонга, ота-онаси бағрига, қайтарилган эди. Шунингдек, Туркияда турли сабаблар туфайли ота-онасининг қарамоғидан маҳрум бўлган 16 ёшли ва 6 ёшли 2 нафар қиз, 11 ёшли бир нафар ўғил бола яқин қариндошларининг мурожаатлари асосида ватанга қайтарилган.
Изоҳ (0)