Хориждан навбатдаги қаровсиз қолган болалар гуруҳи олиб келинди, деб хабар бермоқда Ижтимоий ҳимоя миллий агентлиги ахборот хизмати.
Маълум қилинишича, 1 сентябрда 14 нафар хорижда ота-она қарамоғисиз қийин вазиятга тушиб қолган ўзбекистонлик болалар Ўзбекистонга қайтариб олиб келинди. Мазкур гуруҳдаги болалар Россиянинг Санкт-Петербург шаҳридан Ички ишлар ҳамда Соғлиқни сақлаш вазирликлари масъул ходимларининг хизмат сафарлари доирасида Россиядан Тошкентга олиб келинди.
Ижтимоий ҳимоя миллий агентлиги ва масъул ташкилотлар ҳамкорлигида қайтариб олиб келинган болалар ота-онаси ва ўз яқинларининг қарамоғига қайтарилади. Уларга ўзларининг яшаш манзилига яқин “Инсон” ижтимоий хизматлар марказлари томонидан бир қатор ижтимоий хизматлар, жумладан, болаларнинг ўзлари ва уларнинг оила аъзоларига психологик ва ҳуқуқий ёрдам кўрсатиб бориш белгиланган.
Қайд этилишича, Ижтимоий ҳимоя миллий агентлиги томонидан Ташқи ишлар вазирлиги кўмагида Ички ишлар вазирлиги масъул ходимлари ҳамроҳлигида хорижий мамлакатларда ота-она қарамоғисиз қолган ва мамлакатга қайтарилиши режалаштирилган вояга етмаган болаларни олиб келингунига қадар уларни оилаларига қайтариш ва жамиятга ижтимоийлашувини ташкил этиш бўйича зарур тайёргарлик ишлари амалга оширилмоқда.
Шу кунларда Россиянинг турли ҳудудларида қаровсиз қолиб кетган 31 нафар бола Ўзбекистонга қайтарилган. 25 август куни 9 нафар бола, бундан аввал 22 нафар бола (13 нафари — Санкт-Петербург шаҳридан, 9 нафари — Москва шаҳридан, 8 нафари — Новосибирск шаҳридан, 1 нафари — Қозон шаҳридан олиб келинган) Ички ишлар вазирлиги вакиллари ҳамроҳлигида қайтарилди.
Изоҳ (0)