Ҳиндистондаги Next on Netflix 2025 маросимида медиа платформа томонидан намойиш этиладиган янги Болливуд фильмлари билан танишув маросими бўлиб ўтди. Унда Арян Хон, Иброҳим Али Хон ва бошқа кўплаб ёш ва истеъдодли актёрлар иштирок этди. Қуйида жорий йилда премераси кутилаётган ҳинд фильмларининг рўйхати ва уларнинг қисқача тавсифи билан таништирамиз.
“Жавоҳирлар ўғриси: ҳужум бошланди” (“Jewel Thief: The Heist Begins”)
Жанр: Саргузашт, Триллер
Режиссёр: Сиддҳартҳ Ананд
Ролларда: Саиф Али Хон, Жаидип Аҳлавот
Сюжет: Фильм йирик ўғрилик воқеаси ҳақида бўлиб, унда Саиф Али Хон ва Жайдип Ахлавот бош ролларни ижро этади. Унда қимматбаҳо “алвон қуёш” номли ноёб тош ҳақида сўз боради. Бош қаҳрамонлар тажрибали ўғрилар бўлиб, мураккаб режа асосида уни қўлга киритишга ҳаракат қилади, аммо уларнинг йўлида кутилмаган тўсиқлар, хиёнатлар ва хавфли бурилишлар пайдо бўлади.
“Худди сен каби” (“Аап Жаиса Кои”)
Жанр: Романтик драма
Режиссёр: Каран Сони
Продюсерлар: Каран Жоҳар, Апоорва Меҳта, Сомен Мишра
Ролларда: Фатима Сана Шаиҳ, Р. Мадҳаван
Сюжет: Ушбу романтик драмада икки қарама-қарши характерга эга инсонларнинг севги ҳикояси тасвирланади. Фильм бош қаҳрамонлари Шрирену Трипатҳи (Фатима Сана Шаиҳ) ва Мадҳу Босе (Р. Мадҳаван) – бутунлай фарқ қиладиган турли дунёлардан бўлган икки инсон. Уларнинг ҳаётий қарашлари, орзулари ва одатлари бир-биридан кескин ажралиб туради. Бироқ тақдир уларни кутилмаганда учраштириб, ўзаро яқинлаштиради. Фильм ҳаётий вазиятлар, кулгили саҳналар ва самимий туйғулар орқали томошабинни ўзига тортади.
“Шовқин-сурон” (“Дҳоом Дҳаам”)
Жанр: Романтик, жангари
Режиссёр: Ришаб Сетҳ
Ролларда: Ями Гаутам, Пратик Ганди
Сюжет: Фильмда бир-бирига ўхшамас икки ёшнинг саргузаштли ҳикояси тасвирланади. Уятчан ва онасининг сўзидан чиқмайдиган йигит ҳамда жасур ва қўрқмас қиз ўзларининг тўй кечасида кутилмаганда хавфли жиноятчилар таъқиби остида қолади. Улар бутун тун давомида қувғин ва ҳаяжонли воқеалар гирдобида қолишади. Жиноятчиларнинг асосий мақсади сирли “Чарли” исмли шахсни топиш, бу эса бутун саргузаштнинг калитига айланади. Қаҳрамонлар бир-бирларини яхши тушунмаган ҳолда, ҳаётларини сақлаб қолиш ва ўзаро ҳис-туйғуларини англаб етиш учун курашадилар. Фильмда жангари саҳналар, комедик лаҳзалар ва романтик бурилишлар уйғунлашган бўлиб, у томошабинларга ҳаяжонли ва завқли тажриба тақдим этади.
“Соддадил қалблар” (“Надааниян”)
Жанр: Романтик комедия
Режиссёр: Шона Гаутам
Ролларда: Иброҳим Али Хон, Кҳуши Капур
Сюжет: Фильм бой оиладан чиққан Жанубий Деҳлилик қиз ва оддий, ўртаҳол оиладан келган тиришқоқ йигит ўртасидаги ширин ва қизиқарли романтик воқеани тасвирлайди. Қаҳрамон қиз ўзининг дўстлари олдида мукаммал ҳаёт кечираётгани ҳақида таассурот қолдириш учун йигитни “сохта қаллиқ” сифатида ёллайди. Бироқ вақт ўтиши билан ўйинга ҳақиқий ҳис-туйғулар аралаша бошлайди.
Фильм севгининг кутилмаган йўллар билан келиши, турли табақалар ва ҳаёт тарзи фарқлари фонида инсоний муносабатларнинг ўзгаришини акс эттиради.
“Тест”
Жанр: Драма, спорт
Режиссёр: С. Шашикант
Ролларда: Сиддҳарт, Р. Мадҳаван, Наянтара
Сюжет: Фильм ҳаёт ва спорт ўртасидаги боғлиқлик ва кураш ҳақида ҳикоя қилади. Унда инсон ҳаёти ва унинг танловлари крикет ўйини билан боғланиб кетган драматик воқеалар тасвирланади. Қаҳрамонлар севгиси, орзулари ва қарорларини синовдан ўтказадиган муҳим дақиқаларга дуч келади.
“Тостер” (“Toaster”)
Жанр: Комедия, драма
Режиссёр: Вивек Дашодхари
Ролларда: Ражкуммар Рао, Саня Малҳотра
Сюжет: Фильм оддий ошхона жиҳози — тостер билан боғлиқ қизиқарли, кулгили ва кутилмаган бурилишларга бой фильм. Бу шунчаки нон қиздирадиган мослама эмас, балки бир нечта инсон тақдирини боғловчи сирли ва объектга айланади. Фильмда турли характердаги одамларнинг ҳаёти кесишади ва бу оддий маиший жиҳоз улар учун муҳим сирларни фош қилиш, келажак тақдирини белгилаш ва янги имкониятлар эшигини очиш воситасига айланади. Ҳар бир қаҳрамоннинг ўз ҳикояси ва келажакдаги режалари бўлади аммо ҳаммаси бир нуқтада — тостер билан боғлиқ сюжет чизиғида бирлашади.
“Катта опа” (“Акка”)
Жанр: Триллер, драма
Режиссёр: Дҳармараж Шетти
Ролларда: Киртҳи Суреш, Радҳика Апте, Танви Азми
Сюжет: Фильм 1980 йиллар жанубий Ҳиндистонда жойлашган хаёлий Пернуру шаҳрида содир бўладиган воқеаларни тасвирлайди. Бу жойда матриархат жамияти ҳукм суради, яъни аёллар жамиятнинг асосий бошқарувчилари ҳисобланади.
Асосий эътибор “Акка” — яъни “катта опа” деган унвонга эга бўлган аёл раҳбарларга қаратилади. Улар мафия дунёсида ўз қоидаларига эга бўлади ва бутун шаҳарни назорат қилади. Бироқ ташқаридан келган таҳдид мамлакатдаги мувозанатни бузади ва кучли аёллар ўз ҳукмронлигини сақлаб қолиш учун шафқатсиз курашга киришади. Фильм аёллар кучи, ҳокимият учун кураш ва омон қолиш ҳақида ҳикоя қилади. Қаҳрамонлар шахсий амбициялар ва жамоат манфаатлари ўртасида танлов қилишга мажбур бўлади.
Изоҳ (0)