Янги Тошкент шаҳри қурилиши учун Тошкент вилоятидан яна 122,3 гектар ер ажратилди.
Вилоят ҳокимининг 14 мартдаги тегишли қарори билан Юқори Чирчиқ туманидаги “Бордонкўл” ҳудудидан 75,22 гектар, “Дўстлик” ҳудудидан эса 47,1 гектар ер “Янги Тошкент шаҳрини барпо этиш дирексияси”га доимий фойдаланиш ҳуқуқи билан ажратиб берилди.
2024 йилнинг октябрида Юқори Чирчиқ туманидан давлат захирасига қайтарилган ҳамда тоифаси ўзгартирилган 110,4 гектар ер майдони доимий фойдаланиш ҳуқуқи билан “Янги Тошкент шаҳрини барпо этиш дирексияси”га ажратиб берилганди. Туманнинг “Ўзбекистон”, “Гулистон”, “Истиқлол” маҳаллаларидаги ҳудудлар Янги Тошкент шаҳри ҳудудига ўтказилганди.
Вилоят ҳокимлиги матбуот хизматининг билдиришича, шу кунга қадар жами 2 200 гектардан ортиқ ер майдонлари “Янги Тошкент шаҳрини барпо этиш дирексияси”га доимий фойдаланиш ҳуқуқи билан берилган.
Янги Тошкент шаҳрининг қурилиши
2023 йилнинг март ойида Янги Тошкент шаҳрининг қурилишига тамал тоши қўйилган эди. 2024 йил апрелида бу ерда илк иншоотлар қурилишини бошлаш маросими бўлди.
2023 йилнинг июлида “Янги Тошкент шаҳрини барпо этиш чора-тадбирлари тўғрисида”ги президент қарори қабул қилинган. 500 минг аҳолига мўлжалланган Янги Тошкент шаҳри Чирчиқ ва Қорасув дарёлари оралиғида барпо этилади. Янги Тошкент лойиҳасини амалга ошириш учун танлаб олинган ҳудуд — денгиз сатҳидан 500 метр баланд бўлиб, шаҳарга яқинлиги, ўз иқлими, баҳаволиги ва икки дарё ўртасида жойлашгани билан ноёб ҳисобланади.
Давлат раҳбари 2023 йил сентябрида Янги Тошкент шаҳрининг бош режаси лойиҳаси билан танишганида Янги Тошкент “ақлли” ва “боғ шаҳар” бўлишини айтганди. Давлат идоралари босқичма-босқич Янги Тошкентга кўчиб боради.
2024 йилнинг декабрида президент Янги Тошкент шаҳридаги инфратузилма қурилиши ва илк лойиҳаларни кўздан кечирди. Шаҳарда замонавий урбанизация талаблари асосида “ақлли” технологиялар қўлланади. Меҳмонхона ва ресторанлар, ўзига хос дизайндаги муҳташам бинолар ташриф буюрувчиларга юқори сифатли хизмат кўрсатиши билан бирга шаҳарни туризм марказига айлантиради.
Изоҳ (0)