Илгари фақат илмий фантастикада мавжуд бўлган космосда фойдали қазилмаларни қазиб олиш энди ҳақиқатга айланмоқда. Яқинда Хитойнинг Сзянсу вилояти (Шарқий Хитой) Сюйчжоу шаҳрида жойлашган Хитой кон-технология университетида Хитойдаги биринчи космик робот-кончи яратилди. Бу ҳақда Sinxua агентлиги хабар бермоқда.
Роботни Хитой кон-технология университети профессори Лю Синхуа бошчилигидаги тадқиқотчилар гуруҳи ишлаб чиққан. Робот-кончи олтита оёққа эга бўлиб, учта оёғида ғилдираклар, қолган учтасида эса тирноқсимон маҳкамлаш мосламалари ўрнатилган. Лю Синхуа журналистларга бундай тузилиш асосан космосдаги микрогравитация шароитларига мослашиш учун ишлаб чиқилганини айтди.
Робот-кончи сайёралараро осмон жисмларининг юзасида геологик қидирув ва фойдали қазилмаларни йиғиш вазифаларини бажариши керак, бунда бурғилаш муҳим кўникма ҳисобланади. Ер шароитида роботнинг ўз оғирлиги пармани ушлаб туриш учун етарли, Ойда эса тортишиш кучи Ердагининг олтидан бирини ташкил этади.
Ишлаб чиқувчиларнинг айтишича, вазнсизлик туфайли юзага келадиган силжиш муаммосини ҳал қилиш учун улар робот учун ҳашаротларнинг тирноқли тиканлари тузилишига ўхшаш тирноқли оёқ конструкциясини яратишган.
“Мослашувчан тузилиш нотекис юзада барқарорликни таъминлайди ва роботга бурғилаш ишларини амалга ошириш имконини беради”, дейди ихтирочилар.
Ҳозирги вақтда ишлаб чиқувчилар ушбу робот намунаси учун патент олиш учун тегишли идораларга ариза топширган.
Мутахассисларнинг фикрича, Ернинг ягона табиий йўлдоши бўлган Ой Ерга нисбатан яқин жойлашган ва ресурсларга бой. Ҳозирги кунда Ой ресурсларини қидириш ва ўрганиш бутун дунё эътиборини тортмоқда ва катта миқдордаги сармояларни жалб қилмоқда.
Бундан ташқари, Қуёш тизимидаги кўплаб астероидлар ҳам минерал ресурсларга бой. Улар орасида Ерга яқин астероидлар орбитаси Ерга нисбатан яқин жойлашган. Ҳозирги вақтда 1500 дан ортиқ Ерга яқин астероидлар ресурсларни ўзлаштириш учун жуда катта қийматга эга эканлиги аниқланган.
Изоҳ (0)