Тошкент вилояти ҳокими Зоир Мирзаев вилоятдаги фермер хўжаликлари ҳақида гапириб, 200 гектаргача ери бўлган фермерлар ҳам солиқ тўловларидан қочиш учун ишчиларини қонуний меҳнат шартномаси асосида ишга олмаётганини, бироқ статистикада кўплаб ишчиси борлигини кўрсатувчи ёлғон маълумотлар берганини айтиб, “бу жиноят” деди.
Зоир Мирзаевнинг матбуот котиби Беҳзод Қобуловга кўра, ҳоким бу ҳақда Бекобод туманида вилоятда фаолият юритувчи фермерлар билан учрашуви чоғида гапирган.
Ўзимга 320 тонна ғалла қолди, дейди фермер. Нима қилдингиз бу ғаллани, деб сўрасангиз, ишчиларимга бўлиб бердим, дейди. Статистикани кўтарсак, 48 нафар одамнинг ишга олингани ҳақида ҳисобот бор. Лекин солиқ базасини кўтарсангиз, тўртта: ўзи, хотини, қизи ва келини бор. Тамом, бошқа одам йўқ. Кечирасиз-у, фермер хўжаликлари аҳолига иш бермаса, ким беради? Пахта, ғалла ёки сабзавотнинг ўзи бўлмайди-ку, дейди Зоир Мирзаев.
Қишлоқ хўжалиги вазири Иброҳим Абдураҳмонов, вилоят раҳбари Зоир Мирзаев иштирокида ўтказилган семинарда 2025 йил ҳосили учун вилоятда жами 45,5 минг гектар майдонга чигит экиш режалаштирилгани очиқланган.
Айтилишича, жорий йилда ҳудуддаги мавжуд чигит экиладиган майдоннинг 21 минг 878 гектарига Хитой технологияси асосида чигит экилади.
Шундан 12 минг 770 гектари хорижий навлар, 9 минг 108 гектари маҳаллий чигит уруғи инновацион технологиялар асосида 76х10 схемада экилади. Қолган 23 минг 660 гектари маҳаллий усулда 76 схемада экилиши ҳисоб-китоб қилинган. Пахта етиштиришда 8 та туманда 971 та фермер хўжаликлари ва кластерлар томонидан фақат замонавий технологиялардан фойдаланиш талаб этилади, дейди масъуллар.
Вилоят ҳокимининг қўшимча қилишича, давлат раҳбарининг топшириғи билан жорий мавсумда ҳам фермерларга имтиёзли кредит ажратилиб, ҳатто фермер хўжаликлари ишчилари учун маош пуллари ҳам берилган. Аммо фермер хўжалиги раҳбарлари ишчилари ҳақини қонуний тарзда тўламаяпти.
Банкдан иш ҳақини оляпти, лекин ўша ойлик фермернинг ишчисига берилганини тасдиқловчи ҳужжат йўқ. На пластикка кўчирган, на нақд қилиб берган. Бу жиноят, дейди Зоир Мирзаев.
Тадбир якунида таъкидланишича, вилоятда 1 апрелга қадар чигит экиш ишлари якунланиши режалаштирилган.
Изоҳ (0)