Қорақалпоғистон соғлиқни сақлаш вазири Мурод Қурбонов бошчилигидаги делегация Миср давлатида бўлди.
Сафар давомида вакилларимиз ушбу мамлакатнинг Alameda Group тиббиёт мажмуаси фаолияти, бу ерда яратилган имкониятлар билан яқиндан танишди.
Ўтказилган мулоқот натижасида Қорақалпоғистон соғлиқни сақлаш вазирлиги ва Alameda Group мажмуаси ўртасида ҳамкорлик меморандуми имзоланди.
Ушбу ҳужжат асосида мажмуа таркибидаги Alameda Group’да қорақалпоғистонлик тиббиёт ходимларининг грант асосида малака ошириши ва замонавий технологиялар асосида ўз билим ва кўникмаларини мустаҳкамлаши режалаштирилган.
Alameda Group мажмуаси 1999 йилда ташкил этилган. Ҳозир Мисрдаги энг нуфузли Al Salam International Hospital, Dar El Fouad Hospital, Elixir Care Center, Tabibi Clinics, German Center for Rehabilitation тиббиёт муассасалари ҳамда Alameda Group’ни қамраб олган. Мажмуада 5000 дан ортиқ ходим, шу жумладан, 1000 га яқин шифокор фаолият кўрсатади.
9 ноябрь куни Шавкат Мирзиёевнинг тиббиёт ходимларига йўллаган байрам табригида аҳоли саломатлигига эътиборни кучайтириш орқали инсон қадрини ошириш, унинг ҳаётий манфаатларини таъминлашга қаратилган бундай муҳим ишлар келгусида ҳам изчил давом эттирилишини таъкидлади.
“Тиббиётни янада халқчил соҳага айлантириш, одамларни ушбу тизимдан рози қилиш масаласи доимо эътиборимиз марказида бўлади.
Бу борадаги вазифаларни муваффақиятли адо этишда муқаддас қасамёдига содиқ сиз, заҳматкаш ва олижаноб тиббиёт ходимлари ўзингизни аямасдан, бой билим, маҳорат ва тажрибангизни сафарбар этасиз, деб ишонаман”, деди Шавкат Мирзиёев.
Изоҳ (0)