Блогер Отабек Сатторийнинг қачон озодликка чиқиши маълум қилинди

Сурхондарёлик блогер Отабек Сатторий тез орада озодликка чиқиши мумкин. Бу ҳақда Ўзбекистон инсон ҳуқуқлари “Эзгулик” жамияти фаоли Абдураҳмон Ташанов ўзининг Facebookъдаги саҳифасида маълум қилди. 

Жамият ахборот хизматининг билдиришича, Ички ишлар вазирлигининг Жазони ижро этиш департаменти Абдураҳмон Ташановнинг икки маҳкум — Даулетмурат Тожимуратов ҳамда блогер Отабек Сатторий билан учрашувига имконият яратиб берган. 

Жамиятимиз фаоли Абдураҳмон Ташанов шу йилнинг 12 январь куни Навоийда Даулетмурат Тожимуратов, 13 январда эса Қаршида блогер Отабек Сатторий билан учрашди. Ташановга кўра, икки маҳкумнинг ҳам соғлиғи билан боғлиқ ҳолатдан эътирози йўқ. Улар ўзларига нисбатан чиқарилган суд ҳукмларидан норози, келгусида ўзларининг ҳақ-ҳуқуқлари учун курашни давом эттиришмоқчи, — дейилади жамият ахборот хизмати хабарида. 

Абдураҳмон Ташановнинг Қаршидаги манзил калония бошлиғига таяниб ёзишича, блогер Отабек Сатторий 2024 йилнинг апрель ойи охири ёки май ойи бошида озодликка чиқади. 

Қаршидаги манзил колонияда блогер Отабек Сатторий билан учрашув жуда яхши ўтди. Отабек аввало ўзини қўллаб-қувватлаган барчага миннатдорчилик билдирди. Колония бошлиғининг таъкидича, апрель охири, майнинг бошларида у озодликка чиқади. Тикув цехида ишламоқда, — дейди у. 

Маҳкум Отабек Сатторий “Қамоқдаги расмим интернетга чиқишини истамайман”, дея суратга шунчаки эсталик учун тушишини билдирган. 

Отабекнинг таъкидича, ўзига чиқарилган суд ҳукми бўйича қайта шикоят қилиш нияти йўқ. Тинчгина ахборот технологиялари соҳасида ишламоқчи. Ўзбекистон Республикаси президенти Шавкат Мирзиёевни юксак салоҳиятли лидер, деб билади ва унга хизмат қилишдан ўзидан фахр туяди. Ташанов эса уни жазо муддати битгач, ўзини оқлашга уринишга чақирган, — дейилади жамият ахборот хизмати тарқатган маълумотда.

Жиноят ишлари бўйича Музработ туман судининг 2021 йил 10 майдаги ҳукмига кўра, Отабек Сатторий Жиноят кодексининг 139-моддаси (туҳмат) 3-қисми “а”, “г” бандлари ва 165-моддаси (товламачилик) 3-қисми “а” бандида назарда тутилган жиноятларни содир этганликда айбли деб топилиб, унга Жиноят кодексининг 57-моддаси (енгилроқ жазо тайинлаш) қўлланиб, 59-моддаси (бир неча жиноят содир этганлик учун жазо тайинлаш) ва 61-моддаси (жазоларни қўшишнинг ҳисоблаш қоидалари)га асосан тайинланган жазоларни қисман қўшиш йўли билан узил-кесил 6 йил 6 ой муддатга озодликдан маҳрум қилиш жазоси тайинланган. 4 май куни бўлиб ўтган суд мажлисида прокурор унга 11 йил қамоқ жазоси тайинланишини сўраганди.

Унинг адвокати эса апелляция шикоятини беришини маълум қилганди. Адвокатнинг апелляция ишини Сурхондарё вилоятидан бошқа вилоятга ўтказиш бўйича илтимосномасига асосан апелляция шикояти Самарқанд вилоят суди жиноят ишлари бўйича судлов ҳайъатида кўрилди.

Сатторий иши бўйича апелляция суди 29 июнь куни бошланганди. Судланувчининг адвокати Умидбек Давлатовнинг маълум қилишича, Баҳодир Алиқулов раислигидаги судьялар ҳайъати ўз қарори билан блогер бўйича ҳукмини ўзгартирмаган. Аммо судья блогерга Термизда сотиб олган икки хонадонини қайтариб бериш бўйича ҳукм чиқарган.

Жиноят ишлари бўйича Самарқанд вилоят суди томонидан 6,5 йиллик қамоқ жазосига ҳукм қилинган блогер Отабек Сатторийнинг иши тўғрисида ҳукм чиқарилган. Унга кўра, Сатторийга нисбатан тайинланган 6 йил 6 ойга озодликдан маҳрум қилиш жазоси ўз кучида қолдирилган.