Ўзбекистон инсон ҳуқуқлари “Эзгулик” жамияти фаоли Абдураҳмон Ташанов Ички ишлар вазирлигининг Жазони ижро этиш департаменти ёрдами билан икки маҳкум — Даулетмурат Тожимуратов ҳамда блогер Отабек Сатторий билан учрашув ўтказгани хабар берилганди. Абдураҳмон Ташановнинг “Дарё”га билдиришича, Даулетмурат Тожимуратов учрашув давомида маҳкумларнинг ош-овқатини яхшилаш, бошқа шароитларни тузатиш бўйича таклиф бермоқчилигини билдирган.
Даулетмурат аввалига ўзини бир оз асабий тутди. 2023 йилнинг 25 декабрь куни уни жазони ижро этиш муассасаси тартибини бузганликда айблашибди. Мен унга “буни ҳуқуқий йўл билан бартараф қилинг, ахир сиз ҳуқуқ ҳимоячиси бўлгансиз, судга беринг”, дедим. Кўнди. Сўнг хат ва бандеролларнинг кечикиб келаётганидан, ёзган хатлари ташқарига чиқиши қийин бўлаётганидан шикоят қилди, — дейди Ташанов.
Инсон ҳуқуқлари фаолига кўра, Тожимуратов ўзига нисбатан адвокатлари томонидан илгари сурилаётган қийноқ иддаоларини изоҳлар экан, дастлабки терговлар даврида сочининг мажбурий олиниш жараёнида ходимларга фаол қаршилик кўрсатгани, ўз навбатида ходимлар ҳам у билан зиддиятга бориб, жисмоний куч ишлатганини таъкидлаган.
Бошқа конкрет қийноқ ҳолатлари бўйича гапирмади. Даулетмурат колония раҳбарларини жуда яхши одамлар, улар билан муносабатларим жуда яхши, деди. “Лекин ҳамма нарса уларнинг қўлида эмас, мен жазони ижро этиш тизимини ўзгартириш бўйича кўп таклифлар беряпман, боиси қонунчиликда маҳкумлар билан узоқ муддатли учрашувлар қаттиқ тартибли колонияларда ҳам, умумий тартибдагисида ҳам, узоқ муддатга қамалган ва енгилроқ жазо олганларга ҳам бир хил. Маҳкумларнинг ош-овқатини яхшилаш, бошқа шароитларни тузатиш бўйича кўп гапираман деди, — дейди Абдураҳмон Ташанов.
Ташановнинг қўшимча қилишича, Нукус воқеалари бўйича айбдор деб топилган маҳкум ўқиш учун китоблар сўраган.
Унинг таъкидича, колонияда маҳкумларнинг яқинлари билан учрашувлар даврида назорат ҳаддан ташқари кучли, бу эса маҳкумлар ҳуқуқини камситишдек кўринади. Колония маъмуриятини қонунлардан оғишмаслик, уларга қаттиқ риоя қилишга чақирдим. Ҳамманинг кўнглини бир хилда топиш қийин, бу ерда ягона устуворлик фақат қонун-қоидаларга амал қилишга берилиши керак, — дейди дейди Абдураҳмон Ташанов.
2023 йилнинг 31 январь куни Бухоро вилоятида ўтказилган биринчи инстанция суди Жиноят ишлари бўйича Қорақалпоғистон суди судьяси Элубай Абибуллаев раислигида бўлиб ўтган йиғилишда 22 нафар судланувчига нисбатан ҳукм эълон қилинганди. Хусусан, “Эл хизметинде” газетаси муҳаррири ва блогер Даулетмурат Тожимуратов 16 йилга озодликдан маҳрум этилган, Каллихонова, Турданов, Сметуллаев ва Нуратдинов суд залидан озод қилинган эди.
Изоҳ (0)