Олмалиқдаги колонияда жазони ўтаётган 21 ёшли маҳкум вафот этгани ҳақида хабар берилган эди. Бош прокуратура ҳолатга муносабат билдирди.
Унда айтилишича, Олмалиқ шаҳар ИИБ навбатчилик қисми томонидан 14-сонли жазони ижро этиш колониясида жазо муддатини ўтаётган маҳкум Муҳаммадқодир Пўлатов 15 февраль куни Олмалиқ шаҳар тиббиёт бирлашмаси жонлантириш бўлимида вафот этган.
Мазкур ҳолат юзасидан Олмалиқ шаҳар прокуратураси ходимлари томонидан воқеа жойи ва мурда кўздан кечирилиб, мутасадди ходимлар ва шифокорлардан ҳолат юзасидан тушунтиришлар олинган ва ўлим сабабини аниқлаш учун судга оид тиббий экспертиза тайинланган. Суд-тиббий экспертизасининг дастлабки маълумотига кўра, юрак ишемик касаллигининг ўткир шакли, юрак мушакларида қон кетиши “миокард инфаркти”дан вафот этгани кўрсатилган.
Унинг онаси эса ўғли бирор марта соғлиғидан шикоят қилмаганини, фарзандининг баданида қийноқ излари мавжудлиги, электрошокер изига ўхшаш чизиқлар борлигини айтмоқда.
Айни пайтда Тошкент махсус прокуратураси томонидан терговга қадар текширув ҳаракатлари олиб борилмоқда. Мазкур ҳолат Инсон ҳуқуқлари бўйича вакил (омбудсман) томонидан ҳам назоратга олинди.
Изоҳ (0)