ҲАМАС ва Исроил ўртасидаги сулҳ хавф остида ва у барбод бўлиши мумкин. Бу ҳақда ҳаракат аъзоси Бассем Наим маълум қилди.
Наим Исроилни олти ҳафталик ўт очишни тўхтатиш келишувининг биринчи босқичида белгиланган мажбуриятларни бажаришни кечиктиришда айблади.
Урушни қайта бошлаш бизнинг хоҳишимиз ҳам, қароримиз ҳам эмас, деди сиёсий бюро аъзоси.
Шунингдек, у ҲАМАС Қатарда келишувнинг иккинчи босқичи тафсилотларини муҳокама қилиш учун Исроил билан билвосита музокаралар ўтказишга ҳамон тайёр эканлигини таъкидлади.
Бу музокаралар 3 февралда бошланиши керак эди, аммо томонлар ҳали музокараларга киришмаган, дея қўшимча қилди Наим.
Исроил ва ҲАМАС ўртасида ўт очишни тўхтатиш келишуви ва асирлар алмашинуви
ҲАМАС ва Исроил ўртасида ўт очишни тўхтатиш ва асирларни алмашиш бўйича келишув 19 январь куни кучга кирди.
Асирлар алмашинувининг дастлабки тўрт босқичида Исроил қамоқхоналаридан 583 нафар фаластинлик маҳбус, шунингдек, Ғазо секторидаги 13 нафар исроиллик ва 5 нафар тайлик маҳбус озод қилинди.
8 февраль куни Исроил армияси уч нафар исроиллик асирнинг озод этилишига жавобан 183 нафар фаластинлик маҳбусни қамоқдан чиқарди. Улардан 18 нафари умрбод, 54 нафари эса узоқ муддатли қамоқ жазосига ҳукм қилинган. Яна 111 нафари 2023 йил 7 октябрда Исроил ҳужумлари бошланганидан кейин Ғазо секторида қўлга олинган фаластинликлардир.
Умуман олганда, ўт очишни тўхтатиш тўғрисидаги келишувни амалга ошириш уч босқичда ўтказилади. 42 кун давом этадиган келишувнинг биринчи босқичи доирасида 1900 дан ортиқ фаластинлик ва 33 нафар исроиллик озод қилиниши кутилмоқда.
Изоҳ (0)