Россия президенти Владимир Путин ва АҚШ президенти Дональд Трамп 18 март куни телефон орқали мулоқот ўтказди. Мулоқот 2 соат 28 дақиқа давом этган. Кремль мулоқот юзасидан баёнот берди.
Етакчилар Украина атрофидаги вазият юзасидан батафсил ва очиқ фикр алмашишган. Владимир Путин Дональд Трампга ҳарбий ҳаракатлар ва инсон йўқотишларини тўхтатишдек эзгу мақсадга эришишга ҳисса қўшишга интилгани учун миннатдорлик билдирган.
Суҳбат якунида Путин Трампнинг Россия ва Украина 30 кун давомида энергетика инфратузилмасига зарба беришдан ўзаро воз кечиш ғоясини қўллаб-қувватлаб, ҳарбийларга шу ҳақда кўрсатма берган.
Музокаралар натижасида Россия ва Украина ўртасида ҳарбий асирларни алмашиш бўйича келишувга эришилган бўлиб, у 175 га 175 нисбатда амалга оширилади.
Бундан ташқари Россия яхши ният рамзи сифатида 23 нафар оғир яраланган украиналик ҳарбийни Киевга топширади.
Суҳбатда давлат раҳбарлари Украина Қуролли Кучларининг Курск вилоятидаги бошқа бўлинмалари тақдири ҳақида ҳам фикр алмашган.
“Дональд Трампнинг Курск вилоятида қуршовда қолган украиналик ҳарбий хизматчилар ҳаётини сақлаб қолиш ҳақидаги сўнгги мурожаатига жавобан, Владимир Путин Россия томони инсонпарварлик тамойилларига амал қилишга тайёрлигини ва асирга тушган тақдирда Украина Қуролли Кучлари аскарларига Россия қонунлари ҳамда халқаро ҳуқуқ нормаларига мувофиқ ҳаёт ва муносиб муомала кафолатланишини тасдиқлади”, дейилади баёнотда.
Кремль баёнотида таъкидланишича Россия президенти можарони тинч йўл билан ҳал этишга қатъий содиқлигини тасдиқлаб, америкалик ҳамкорлар билан биргаликда ҳал қилишнинг кенг қамровли, барқарор ва узоқ муддатли бўлиши лозим бўлган йўлларини пухта ишлаб чиқишга тайёрлигини билдирган.
“Албатта бунда инқирознинг асл сабабларини бартараф этиш зарурлиги ва Россиянинг хавфсизлик соҳасидаги қонуний манфаатларини ҳисобга олиш кераклиги таъкидланди”, дейилади баёнотда.
Шунингдек, можаро авж олишига йўл қўймаслик ва уни сиёсий-дипломатик йўл билан ҳал қилиш бўйича иш олиб боришнинг асосий шарти Киевга хорижий ҳарбий ёрдам ва разведка маълумотларини тақдим этишни тўлиқ тўхтатиш бўлиши кераклиги таъкидланган.
“Етакчилар Украина масаласини икки томонлама тартибда, шу жумладан АҚШ президентининг юқорида қайд этилган таклифларини ҳисобга олган ҳолда ҳал этишга эришиш бўйича саъй-ҳаракатларни давом эттириш ниятида эканлигини тасдиқлади. Шу мақсадда Россия ва Америка эксперт гуруҳлари тузилмоқда”, дейилади Кремль баёнотида.
Таъкидланишича, президентлар кўтарилган барча масалалар юзасидан доимий алоқада бўлишга келишиб олган.
Аввалроқ, АҚШ президенти Дональд Трамп 18 март куни россиялик ҳамкасби Владимир Путин билан бўлиб ўтадиган суҳбатда қайси ҳудудлар Россия назоратида қолишини муҳокама қилиши хабар берилганди.
Изоҳ (0)