Украина президенти Владимир Зеленскийнинг 28 февраль куни Оқ уйга ташрифида юзага келган можаро босим ўтказиш стратегиясининг бир қисми эди. Бу ҳақда АҚШ президенти Дональд Трамп 17 март куни Кеннеди марказида журналистлар олдида сўзлаган нутқида айтиб ўтди.
Биз Украинани тўғри йўлга йўналтиришимиз керак эди. Бу оддий вазият эмас эди. Сиз Овал кабинетдаги кичик саҳнани кўрдингиз, аммо ҳозир улар тўғри йўлдан кетмоқда деб ўйлайман. Биз тинчлик келишувига эришиш, ўт очишни тўхтатиш, кейин эса тинчлик битимига эришиш учун ҳаракат қилмоқдамиз, деди АҚШ президенти журналистлар билан суҳбатда.
Трамп Украинадаги урушда кўплаб одамлар ҳалок бўлаётганини қўшимча қилиб, барчасини тўғри қилганига ишонч билдирди. Бундан ташқари, у Украинага қурол-яроғ ва разведка маълумотларини етказиб беришни тўхтатиш ҳақидаги саволга жавоб берар экан, бу қарор Россиянинг Курск вилоятидаги Украина армияси учун ҳеч қандай оқибатларга олиб келмаганини айтди.
Йўқ, йўқ, асло ундай эмас. Агар мен кўплаб ўлимларга сабаб бўладиган ёмон иш қилаётган бировни кўрсам, аралашишимнинг ягона сабаби инсонпарварликдир. Мен инсонийлик учун аралашяпман, чунки у ерда кўп одамлар ҳалок бўлмоқда, деди у.
Президентлар ўртасидаги жанжал 28 февраль куни содир бўлди. Зеленский Владимир Путин билан дипломатик муносабатлар ўрнатишга қарши чиқиб, ўз позициясини Москва илгари эришилган келишувларни бир неча бор бузгани билан асослади.
Бунга жавобан Трамп ва АҚШ вице-президенти Венс Зеленскийни танқид қилиб, уни урушни давом эттириш истаги ва Америка томонига ҳурматсизликда айблади. Охир-оқибат, учрашув баҳсга айланиб кетди ва Зеленский фойдали қазилмалар бўйича битимни имзоламасдан Оқ уйни муддатидан олдин тарк этди. Воқеадан сўнг Трамп маъмурияти Украинага ҳарбий ёрдамни тўхтатишини эълон қилди. Зеленский АҚШ президентидан Оқ уйда юз берган баҳс учун узр сўради.
Изоҳ (0)