Тошкент вилояти ҳокими Зоир Мирзаев бугун бўлиб ўтаётган Олий Мажлис Қонунчилик палатаси ва маҳаллий кенгашлар депутатлари сайловида иштирок этиб, барча тошкентликларни сайловга чорлади. Шунингдек, бу сайловда менинг овозим нимани ҳал қилади дегувчиларга ҳам юзланди. Бу ҳақда сайлов жараёнини кузатган “Дарё” журналисти хабар берди.
Маълум бўлишича, Тошкент вилояти ҳокими Зоир Мирзаев Нурафшон шаҳридаги 7-сайлов участкасида фуқаролик ҳуқуқидан фойдаланиб, ўзи муносиб деб билган номзодларга овоз берган.
Бугун аҳолида кўтаринки кайфиятни кўряпмиз. Сабаби мана шунақа форматдаги яъни янгиланган Конституциядан кейин дунё стандартларига жавоб берадиган мажоритар-пропорсионал тарздаги сайловлар ўтказилиши Ўзбекистон тарихида биринчи маротаба бўляпти. Халқимиз шуни чуқур ҳис қилган ҳолда Ўзбекистоннинг кейинги беш йиллик келажагига, эртанги кунига, фарзандлари тақдирига бефарқ бўлмай бугун сайловда овоз бермоқда, — деди сайловда овоз берган вилоят раҳбари.
Тошкент вилояти ҳокимининг айтишича, сайловга тайёргарлик жараёнида аҳолида туғилган кўплаб саволлар ва уларга жавоб олиниши, одамларнинг ҳуқуқий онги ўсиб боришидан далолат беради.
Сайловгача бўлган жараён Оммавий ахборот воситаларида жуда кенг ёритилди. Бу аҳолининг ҳуқуқий онги ўсишига туртки бўлди. Бугунги сайловда оилавий иштирок этиб, овоз бердик. Тошкент вилояти аҳолисини ҳам сайловда фаол бўлишга чорлаб қоламан, — дейди ҳоким.
Зоир Мирзаев “Дарё” журналистининг саволига жавоб қайтарар экан, “Сайловда бир менинг овозим нимани ҳал қилади деган инсонлар келажагига бафарқ инсонлар, биз улар билан янаям кўпроқ ишлашимиз ва уларга тушунтиришимиз керак”, деди.
Сайловда овоз бериш, депутат сайлаш ҳуқуқи кўпчилик учун балки кичкина ҳуқуқдир, лекин бу бепул таълим олиш, бепул даволаниш, пенсия олиш каби бир қатор ҳуқуқлардан кам бўлмаган ва ўшаларнинг заминини ҳал қилиб берувчи сайлов, — дейди вилоят раҳбари.
Изоҳ (0)